ദുബായ് – നിലവിൽ യു.എ.ഇയിൽ താമസ വീസയുള്ളവർക്ക് ഇനിമുതൽ യുകെ വീസ 15 പ്രവൃത്തി ദിവസത്തിനുള്ളിൽ ലഭിക്കും. ദീർഘകാലത്തെ പ്രവാസികൾ അനുഭവിച്ചിരുന്ന ഒരു പ്രശ്നത്തിനായാണ് ഇപ്പോൾ വിരാമമായത്. ഏഴ് ആഴ്ചവരെ എടുത്തിരുന്ന വീസ നടപടികളാണ് രണ്ടാഴ്ചയായി കുറഞ്ഞത്.
വീസ ലഭിക്കാനുള്ള കാലതാമസം കാരണം കഴിഞ്ഞ വേനലവധിക്ക് യുകെ യാത്ര ബുക്ക് ചെയ്ത പല യാത്രികരും അവസാന നിമിഷം യാത്ര റദ്ദാക്കിയിരുന്നു. അതേസമയം ഹീത്രോ വിമാനത്താവളത്തിൽ ദിവസം 1 ലക്ഷത്തിൽ കൂടുതൽ യാത്രക്കാരെ അനുവദിക്കില്ലെന്ന നിബന്ധനയും യാത്രക്കാരെ വിഷമത്തിലാക്കി തിരിച്ചടിയായി.
എന്നാൽ നിലവിലെ നിയന്ത്രണങ്ങൾ എടുത്തു കളഞ്ഞതും ബ്രിട്ടിഷ് എയർവേയ്സ്, എമിറേറ്റ്സ് കമ്പനികൾ അവരുടെ മുഴുവൻ വിമാനങ്ങളും സർവീസിനിറക്കുന്നതും യുകെ യാത്ര കൂടുതൽ എളുപ്പമാക്കും. ബിസിനസ് വീസകൾ 48 മണിക്കൂറിനകം ലഭ്യമാക്കുമെന്നും യുകെ ഇമിഗ്രേഷൻ അറിയിച്ചു.ഒപ്പം യാത്രക്കാർക്ക് സുഗമമായ യാത്രക്കായി വിമാന നിരക്കു കുറച്ചും സീറ്റുകൾ വർധിപ്പിച്ചതായും ട്രാവൽ ഏജൻസികൾ പറയുന്നു.
എന്നാൽ വീസ നടപടികൾ വേഗത്തിൽ പൂർത്തിയാക്കിയതിനാൽ ഇത്തവണ കൂടുതൽ പ്രവാസികൾ യുകെ യാത്ര തിരഞ്ഞെടുക്കുമെന്നാണ് ട്രാവൽ ഏജൻസികളുടെ പ്രതീക്ഷ.
