ദുബായ്: ഉപയോക്താക്കൾക്കും നിക്ഷേപകർക്കും സ്വർണ്ണവും വെളളിയും സ്വന്തമാക്കാനുള്ള യുഎഇയിലെ ആദ്യത്തെ ഇമറാത്തി ആപ്പായ ഒ- ഗോൾഡ്, സ്വർണ സംസ്കരണ ശാലയായ എമിറേറ്റ്സ് ഗോൾഡ് റിഫൈനറിയുമായി കൈകോർക്കുന്നു. ഗൾഫിലെ ഏറ്റവും ആദ്യത്തേതിലൊന്നും മുൻനിരയിലുമുള്ള സ്വർണ റിഫൈനറിയാണ് എമിറേറ്റ്സ് ഗോൾഡ്. എമിറേറ്റ്സ് റിഫൈനറിയുടെ മൂന്നു പാതിറ്റാണ്ടിലേറെ കാലത്തെ വിശ്വാസ്യതയും പാരമ്പര്യവും ഓ-ഗോൾഡിന്റെ നൂതന ഡിജിറ്റൽ സാങ്കേതികതയും ഒത്തുചേരുന്നതിലൂടെ വിപണിയിൽ മികച്ച മുന്നേറ്റമാണ് ഇരു ബ്രാൻഡുകളും ലക്ഷ്യം വെക്കുന്നത്.
ഒ-ഗോൾഡിന്റെ 75,000-ലധികം വരുന്ന ഉപയോക്താക്കൾക്ക്, സർട്ടിഫൈഡ് ഗോൾഡ് ഉൽപ്പന്നങ്ങൾ നേരിട്ട് റിഫൈനറി നിരക്കിൽ, വേഗത്തിൽ സ്വന്തമാക്കാൻ അവസരം നൽകുന്നതാണ് ഈ പങ്കാളിത്തം. ഒ-ഗോൾഡ് വാലറ്റ് വഴിയാണ് സ്വർണം ഉപഭോക്താക്കൾക്ക് ലഭ്യമാക്കുക. യുഎഇയിലെ സാധാരണ നിക്ഷേപകർക്ക് എളുപ്പത്തിൽ മൂല്യമേറിയ ലോഹങ്ങളിൽ നിക്ഷേപിക്കാൻ ഇതിലൂടെ കഴിയുമെന്ന് ഒ-ഗോൾഡിന്റെ സ്ഥാപകനായ ബന്ദർ അൽഒത്മാൻ പറഞ്ഞു.
ലോകനിലവാരത്തിലുള്ള മികച്ച ഉത്പന്നങ്ങൾ ഉറപ്പുവരുത്താൻ വിട്ടുവീഴ്ചയില്ലാത്ത ഗുണനിലവാര മാനദണ്ടങ്ങൾ പാലിച്ചു കൊണ്ട് 1992 മുതൽ പ്രവർത്തിക്കുന്ന എമിറേറ്റ്സ് ഗോൾഡ്, മിഡിൽ ഈസ്റ്റിലെ സ്വർണ്ണ-വെളളി വിപണിയിൽ കഴിഞ്ഞ 33 വർഷമായി മുൻനിലയിലുള്ള സ്ഥാപനമാണ്. ഒ-ഗോൾഡുമായുള്ള പങ്കാളിത്തം, യുഎഇയിലെ നിക്ഷേപകർക്ക് വിലയേറിയ ലോഹങ്ങളിലെ നിക്ഷേപം സുരക്ഷിതവും സുതാര്യവും ഗുണനിലവാരമുള്ളതുമാക്കാൻ സഹായിക്കുമെന്ന് എമിറേറ്റ്സ് ഗോൾഡിന്റെ സിഇഒ അഭിജിത് ഷാ കൂട്ടിച്ചേർത്തു.
എമിറേറ്റ്സ് റിഫൈനറിയുമായുള്ള കരാറിലൂടെ “യുഎഇ ഗുഡ് ഡെലിവറി” സർട്ടിഫിക്കേഷൻ നേടിയ സ്വർണ്ണ-വെളളി ബാറുകളുടെയും നാണയങ്ങളുടെയും വിപുലമായ കളക്ഷനുകളാണ് ഒ-ഗോൾഡ് ഉപയോക്താക്കൾക്ക് നേരിട്ട് റിഫൈനറിയിൽ നിന്ന് ലഭിക്കുക. വീട്ടിലേക്ക് തന്നെ സുരക്ഷിതമായി എത്തിക്കാനുള്ള സൗകര്യവും ലഭ്യമാണെന്നും അധികൃതർ പറഞ്ഞു.
