ദുബായ് – ലോകത്തിലെ ഏറ്റവും വലിയ നിരീക്ഷണ ചക്രമായ ഐൻ ദുബൈ അറ്റകുറ്റപ്പണികൾ പൂർണമായും പൂർത്തീകരിച്ച ശേഷം കുറച്ച് മാസങ്ങൾക്ക് ശേഷമെ തുറക്കൂ എന്ന് അധികൃതർ വെബ്സൈറ്റിൽ വ്യക്തമാക്കി. മാർച്ച് 14നാണ് അറ്റകുറ്റപ്പണിക്കായി ഐൻ ദുബൈ അടച്ചത്. കഴിഞ്ഞ പെരുന്നാൾ അവധി സമയത്ത് തുറക്കുമെന്നായിരുന്നു അന്ന് അറിയിച്ചിരുന്നത്. എന്നാൽ അറ്റകുറ്റപ്പണികൾ പൂർത്തീകരിക്കാത്ത കാരണം പ്രവർത്തനം നീട്ടിവെക്കുകയായിരുന്നു.
ഐൻ ദുബൈയിലെ നവീകരണ പ്രവർത്തനം ഊർജിതമായി നടക്കുന്നുണ്ട്. അതിനാൽ അടുത്ത വർഷം ആദ്യ പാദത്തോടെ തുറക്കുമെന്നാണ് കരുതുന്നത് എന്ന് അധികൃതർഅറിയിച്ചു.
ലോകത്തിലെ ഏറ്റവും വലിയ നിരീക്ഷണ ചക്രമായ ഐൻ ദുബൈ 250 മീറ്ററാണ് ഉയരം. മുകളിലെത്തിയാൽ 360 ഡിഗ്രിയിൽ ദുബൈയുടെ മൊത്തം കാഴ്ചകൾ ആസ്വദിക്കാം. ഇതിന്നായി വിശാലമായ 48 ആഡംബര കാബിനുകാളുണ്ട്. ഐൻ ദുബൈ ഒരു തവണ കറക്കം പൂർത്തിയാക്കാൻ 38 മിനിറ്റ് വേണം. കഴിഞ്ഞ വർഷം ഒക്ടോബറിലാണ് ഐൻ ദുബൈ സന്ദർശകർക്കായി തുറന്നുകൊടുത്തത്.
