ദുബായ്: ദുബായ് തന്റെ സിനിമാ ജീവിതത്തിൽ ഭാഗ്യനഗരമായി മാറിയതായി വ്യക്തമാക്കി നടൻ അർജുൻ അശോകൻ. തന്റെ പുതിയ ഹൊറർ-കൊമഡി ചിത്രം ‘സുമതി വളവ്’ ദുബായിലെ റീൽസ് സിനിമയിൽ പ്രമോട്ട് ചെയ്യുന്നതിനിടയിൽ ആണ് അദ്ദേഹം ഈ ആസ്വാദനങ്ങൾ പങ്കുവെച്ചത്. “സിനിമയിലേയ്ക്ക് തിരിച്ചു വരുന്നത് കുറച്ച് ശൂന്യമായ സമയത്ത്, കുടുംബത്തോടൊപ്പം ദുബായിലേക്ക് ഒരു ബ്രേക്കിന് വന്നപ്പോഴാണ് സൗബിൻ ഷാഹിറിന്റെ കോൾ വന്നത്. അത് റോമാഞ്ചം എന്ന ചിത്രത്തിലേയ്ക്ക് എന്നെ നയിച്ചു. എന്റെ കരിയറിലെ വലിയ വഴിത്തിരിവായിരുന്നു അതെന്ന് ഞാൻ വിശ്വസിക്കുന്നു,” അർജുൻ പറഞ്ഞു. അടുത്തിടെ കേരളത്തിൽ ഒരു വലിയ പ്രോജക്ട് ഒപ്പുവെച്ചതിന് ശേഷം വീണ്ടും ദുബായിൽ എത്തിയതായിരുന്നു അദ്ദേഹം. “ഇന്നലെ ആ പ്രോജക്ട് ഓകെ ആയി എന്ന് വിളിച്ചാണ് അവർ പറഞ്ഞത്. അച്ഛനോടു പറഞ്ഞപ്പോൾ, ‘നീ ഇടയ്ക്കിടെ ദുബായ് പോയി വാ’ എന്നായിരുന്നു മറുപടി,” അദ്ദേഹം കൂട്ടിചേർത്തു.
വിഷ്ണു ശശി ശങ്കർ സംവിധാനം ചെയ്ത ‘സുമതി വളവ്’ പേടിത്തൊണ്ടന്മാരെക്കുറിച്ചുള്ള ഗ്രാമീണ കഥയാണെന്ന് അർജുൻ പറഞ്ഞു. തന്റെ കഥാപാത്രമായ അപ്പുവിന്റെ വ്യക്തിത്വം സ്വാഭാവികമായി തന്നെ ധരിക്കാനായതിന്റെ കാരണവും അർജുൻ തന്റെ യഥാർത്ഥ ജീവിതം തന്നെയാണ് എന്ന് തുറന്നു പറഞ്ഞു. 1980–90 കാലഘട്ടത്തിലെ ഹിറ്റ് സിനിമകൾ പോലെയുള്ള തിരക്കഥയാകണമെന്നതാണ് എന്റെ സ്വപ്നം. കിരീടം പോലെയുള്ള ചിത്രങ്ങൾ ഇന്നത്തെ തലമുറക്ക് എങ്ങനെ ചേർക്കാമെന്ന് ആലോചിച്ചാണ് ഈ പ്രൊജക്റ്റിൽ കയറിയത്. 1993 കാലഘട്ടം സജീവമായി വീണ്ടും സൃഷ്ടിക്കാനായി മണിച്ചിത്രത്താഴ് ഒരു റഫറൻസായി ഉപയോഗിച്ചു തിരക്കഥാകൃത്ത് അഭിലാഷ് പിള്ള പറഞ്ഞു. മൈലമൂട് എന്ന സ്ഥലത്തെ യഥാർത്ഥ നാടോടിക്കഥകളാണ് ചിത്രത്തിന് പ്രചോദനമായതെന്നും സംവിധായകൻ പറഞ്ഞു.
ബാലു വർഗീസ്, ഗോപികാ അനിൽ, ശ്രാവൺ മുകേഷ് തുടങ്ങിയവരും ചിത്രത്തിൽ പ്രധാന കഥാപാത്രങ്ങളായുണ്ട്. പ്രീമിയർ ഷോ കഴിഞ്ഞ് ചിത്രത്തിന് മികച്ച പ്രതികരണമാണ് ലഭിച്ചിരിക്കുന്നത്. വാട്ടർമാൻ ഫിലിംസും ഗോകുലം മൂവീസും ചേർന്ന് നിർമ്മിച്ച ചിത്രം നാളെ ഗൾഫിലും കേരളത്തിലും റിലീസ് ചെയ്യും. ഗൾഫിലെ വിതരണക്കാർ ദുബായിലെ ദി പ്ലോട്ട് പിക്‌ച്ചേഴ്‌സ് ആണ്.
