ദുബായ്: സൗദി അറേബ്യയിലെ ഖമീസ് മുഷൈത്തിനും റിയാദിനും നേരെയുണ്ടായ ബാലിസ്റ്റിക് മിസൈൽ ആക്രമണങ്ങൾ പ്രതിരോധിച്ചതായി സൗദി സഖ്യസേന അറിയിച്ചു. മേഖലയിൽ സംഘർഷം തുടരുന്നതിനിടെ സൗദിയിലേക്കും തിരിച്ചുമുള്ള വിമാനസർവീസുകൾ റദ്ദാക്കുന്നതും തുടരുകയാണ്.
ഇന്ത്യയിൽനിന്ന് റിയാദിലേക്കുള്ള എല്ലാ സർവീസുകളും ഈ മാസം 31 വരെ റദ്ദാക്കിയതായി ഇൻഡിഗോ അറിയിച്ചു. ജിദ്ദ, ദമാം, മദീന എന്നിവിടങ്ങളിലേക്കുള്ള സർവീസുകൾ 27 വരെയും റദ്ദാക്കിയിട്ടുണ്ട്. ദുബായിൽനിന്ന് ദമാം, റിയാദ്, അബ്ഹ എന്നിവിടങ്ങളിലേക്കുള്ള ഫ്ലൈദുബായ് സർവീസുകൾ 29 വരെ നിർത്തിവെച്ചതായും റിപ്പോർട്ടുണ്ട്.
അതേസമയം, യെമനിലെ സുഖാർ ദ്വീപിനു സമീപം ആക്രമിക്കപ്പെട്ട ഇന്ത്യൻ യോട്ടിലുണ്ടായിരുന്ന 14 പേരും സുരക്ഷിതരാണെന്ന് ഇന്ത്യൻ എംബസി അറിയിച്ചു. ഇവരെ യെമനിലെ ഹൊദെയ്ദയിൽ എത്തിച്ചിട്ടുണ്ട്. യോട്ടിനു നേരെയുണ്ടായ ആക്രമണത്തിന്റെ കാരണം വ്യക്തമല്ലെന്നും എംബസി അറിയിച്ചു.
യെമനിൽ സാധാരണ ജനങ്ങളെയും ഗോത്രവിഭാഗങ്ങളെയും സഖ്യസേന ലക്ഷ്യമിട്ടെന്ന ഹൂതികളുടെ ആരോപണം സൗദി നിഷേധിച്ചു. ഗോത്രവിഭാഗങ്ങളെ യുദ്ധത്തിലേക്ക് വലിച്ചിഴയ്ക്കാനുള്ള നീക്കമാണ് ആരോപണത്തിനു പിന്നിലെന്നും സൗദി വ്യക്തമാക്കി.
അതിനിടെ, ദമാമിലെ കിങ് ഫഹദ് രാജ്യാന്തര വിമാനത്താവളത്തിൽ കൊല്ലപ്പെട്ട പ്രവാസി ഇന്ത്യക്കാരൻ കമലേഷ് പാണ്ഡെയുടെ മൃതദേഹം നാട്ടിലെത്തിക്കാനുള്ള നടപടികളും പുരോഗമിക്കുകയാണ്.
