ഏഷ്യൻ പാര ഗെയിംസിൽ വീൽചെയർ ബാഡ്മിന്റണിൽ ചരിത്രനേട്ടവുമായി മലയാളി താരം ആൽഫിയ ജെയിംസ്. ഡബിൾസ് വിഭാഗത്തിൽ ആൽഫിയ ജെയിംസും പല്ലവി കലുഷെഹല്ലിയും അടങ്ങുന്ന സഖ്യമാണ് വെങ്കല മെഡൽ സ്വന്തമാക്കിയത്. ഇന്ത്യൻ വീൽചെയർ ബാഡ്മിന്റണിന്റെ ചരിത്രത്തിൽ ഈ നേട്ടം നിർണായകമായി.
സെമിഫൈനലിൽ ചൈനയുടെ ക്സു ടിങ്റ്റിങ്–യാങ് ഫാൻ സഖ്യത്തോടാണ് ആൽഫിയ–പല്ലവി സഖ്യം പരാജയപ്പെട്ടത്. 3–21, 9–21 എന്ന സ്കോറിനായിരുന്നു തോൽവി. എന്നാൽ സെമിഫൈനലിലെത്തിയതോടെ ഇന്ത്യൻ സഖ്യം വെങ്കല മെഡൽ ഉറപ്പിച്ചിരുന്നു.
ഗ്രൂപ്പ് ഘട്ടത്തിൽ ചൈനയുടെ ലി ജിയാക്വി–ലി ഹോങ്യാൻ സഖ്യത്തെ മറികടന്നാണ് ആൽഫിയയും പല്ലവിയും സെമിഫൈനലിലേക്ക് മുന്നേറിയത്. ഈ വിജയത്തോടെ അന്താരാഷ്ട്ര വേദിയിൽ ഇന്ത്യൻ വീൽചെയർ ബാഡ്മിന്റണിന്റെ കരുത്ത് തെളിയിക്കാനും താരങ്ങൾക്ക് കഴിഞ്ഞു.
മലയാളി താരം ആൽഫിയ ജെയിംസിന്റെ ഈ നേട്ടം കായികരംഗത്ത് കേരളത്തിനും അഭിമാനമായി. വെല്ലുവിളികളെ അതിജീവിച്ച് രാജ്യത്തിനായി മെഡൽ നേടിയ താരത്തിന് അഭിനന്ദനപ്രവാഹമാണ്.
