ദുബായ്: വിസ അപേക്ഷയിൽ നൽകുന്ന വിവരങ്ങളുടെ കൃത്യത ഉറപ്പാക്കണമെന്ന് യുഎഇയുടെ ജനറൽ ഡയറക്ടറേറ്റ് ഓഫ് ഐഡന്റിറ്റി ആൻഡ് ഫോറിനേഴ്‌സ് അഫയേഴ്‌സ് (GDRFA) മുന്നറിയിപ്പ് നൽകി. ചിലർ ഇപ്പോഴും അശ്രദ്ധയോടെ അപൂർണ്ണമോ തെറ്റായവയോ ആയ വിവരങ്ങൾ സമർപ്പിക്കുന്ന സാഹചര്യത്തിലാണ് ഈ നിർദ്ദേശം. അവ്യക്തമായ വിവരങ്ങൾ നൽകുന്നത് വിസ അപേക്ഷാ നടപടികളിൽ അനാവശ്യമായ കാലതാമസം സൃഷ്ടിക്കും. അപേക്ഷാ നടപടികൾ കൂടുതൽ വേഗത്തിൽ പൂർത്തിയാകാൻ ശരിയായതും കൃത്യമായതുമായ വ്യക്തി വിവരങ്ങൾ നിർണായകമാണെന്ന് ഡയറക്ടറേറ്റ് വ്യക്തമാക്കി.
അപേക്ഷകളിൽ ശ്രദ്ധിക്കേണ്ട കാര്യങ്ങൾ:
^ പൂർണ്ണമായ വ്യക്തി വിവരങ്ങൾ
^ ഇമെയിൽ ഐ.ഡി
^ മൊബൈൽ നമ്പർ
^ പേരിലെ അക്ഷരങ്ങൾ (സ്പെല്ലിംഗ് അടക്കം)
ദുബായിലെ ആമർ സെന്ററുകളിലൂടെയോ സ്മാർട്ട് സേവന ചാനലുകളിലൂടെയോ നൽകിയ അപേക്ഷകൾ ഈ വിവരങ്ങളുടെ അടിസ്ഥാനത്തിലാണ് അനുസരിച്ച് നടപടികൾ സ്വീകരിക്കുന്നത്. അതിനാൽ സേവനം തേടുന്നവർ അപേക്ഷയിലെ വിവരങ്ങൾ കൃത്യമാണെന്ന് ഉറപ്പാക്കേണ്ടത് അത്യന്താപേക്ഷിതമാണ്. ദുബായിൽ വിസ നടപടികൾ ഏറ്റവും വേഗത്തിലാണ് നടപ്പാക്കുന്നത്. ഉപയോക്താക്കൾക്ക് പരമാവധി സന്തോഷകരമായ സേവനം നൽകുക എന്നതാണ് ഞങ്ങളുടെ ലക്ഷ്യം. എന്നാൽ, തെറ്റായ വിവരങ്ങൾ നൽകുന്നതിലൂടെ ചില അപേക്ഷകൾക്ക് നടപടിക്രമം വൈകുകയാണ് എന്ന് ഡയറക്ടറേറ്റിന്റെ മേധാവിയായ ലഫ്റ്റനന്റ് ജനറൽ മുഹമ്മദ് അഹ്മദ് അൽ മർറി അറിയിച്ചു. അവസാനമായി, അപേക്ഷകർ തങ്ങൾ നൽകുന്ന എല്ലാ വിവരങ്ങളും ശരിയായതാണെന്ന് രണ്ടാമതും മൂന്നാമതുമായി പരിശോധിക്കണമെന്നും അദ്ദേഹം ആവശ്യപ്പെട്ടു.
