ദുബായ്: യു.എ.ഇ യുടെ സ്വപ്ന പദ്ധതിയായ ഇത്തിഹാദ് റെയിൽ പാസഞ്ചർ സർവീസുകൾ 2026-ൽ ആരംഭിക്കും.ആദ്യ ഘട്ടത്തിൽ അബുദാബി, ദുബായ്, ഫുജൈറ എന്നീ നഗരങ്ങളെയാണ് ഈ ട്രെയിൻ ശൃംഖല ബന്ധിപ്പിക്കുന്നത്. യാത്രാ സൗകര്യം വർദ്ധിപ്പിക്കുന്നതിനായി ദുബായ് മെട്രോയുടെ റെഡ് ലൈൻ, വരാനിരിക്കുന്ന ഗോൾഡ് ലൈൻ എന്നിവയുമായി റെയിൽവേ സ്റ്റേഷനുകളെ ബന്ധിപ്പിക്കുമെന്നും അധികൃതർ വ്യക്തമാക്കി.
അത്യാധുനിക രീതിയിൽ രൂപകൽപ്പന ചെയ്ത ഓരോ ട്രെയിനിലും വൈ-ഫൈ, പേഴ്സണൽ ചാർജിംഗ് പോയിന്റുകൾ തുടങ്ങിയ സൗകര്യങ്ങളുണ്ടാകും. 400 യാത്രക്കാരെ വഹിക്കാൻ ശേഷിയുള്ള 13 ട്രെയിനുകളിൽ പത്തെണ്ണം ഇതിനോടകം യുഎഇയിൽ എത്തിക്കഴിഞ്ഞു. ആഗോള ഗതാഗത വിദഗ്ധരായ ‘കിയോലിസ്’ (Keolis) കമ്പനിയുടെ മേൽനോട്ടത്തിൽ പ്രവർത്തിക്കുന്ന ഈ സർവീസ്, 2030-ഓടെ പ്രതിവർഷം 3.6 കോടി യാത്രക്കാരെ ലക്ഷ്യമിടുന്നു. യാത്രക്കാർക്ക് സുരക്ഷിതവും വേഗതയേറിയതുമായ ഒരു പുതിയ യാത്രാനുഭവമായിരിക്കും ഇത്തിഹാദ് റെയിൽ നൽകുന്നതെന്നും അധികൃതർ കൂട്ടിച്ചേർത്തു.
