ദുബായ്: പൊതുഗതാഗത രംഗത്ത് പുതിയ അധ്യായം കുറിച്ച് ബ്ലൂ ലൈൻ മെട്രോ പദ്ധതിക്ക് ഔദ്യോഗിക തുടക്കം. യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂം പദ്ധതിക്ക് തുടക്കം കുറിച്ചതോടെ നഗര ഗതാഗത വികസനത്തിലെ നിർണായക ചുവടുവയ്പ്പായി ഇത് മാറുകയാണ്.
ഏകദേശം 18 ബില്യൺ ദിർഹം ചെലവിൽ നടപ്പാക്കുന്ന പദ്ധതിയുടെ ആകെ ദൂരം 30 കിലോമീറ്ററാണ്. ഇതിൽ വലിയൊരു വിഭാഗം ഭൂഗർഭ ടണലുകളിലൂടെയാണ് കടന്നുപോകുക. 14 അത്യാധുനിക സ്റ്റേഷനുകൾ ഉൾപ്പെടുന്ന ബ്ലൂ ലൈൻ, ദുബായ് ക്രീക്ക് ഹാർബർ, ഇന്റർനാഷണൽ സിറ്റി, ദുബായ് സിലിക്കൺ ഒയാസിസ്, അക്കാദമിക് സിറ്റി ഉൾപ്പെടെയുള്ള പ്രധാന മേഖലകളെ തമ്മിൽ ബന്ധിപ്പിക്കും.
നഗരത്തിലെ ജനസാന്ദ്രത കൂടിയ മേഖലകളിലേക്ക് കൂടുതൽ വേഗത്തിലും സൗകര്യപ്രദമായും യാത്ര സാധ്യമാക്കുകയാണ് പദ്ധതിയുടെ പ്രധാന ലക്ഷ്യം. ബ്ലൂ ലൈൻ പൂർത്തിയാകുന്നതോടെ ഏകദേശം പത്ത് ലക്ഷം ആളുകൾക്ക് നേരിട്ടുള്ള ഗതാഗത സൗകര്യം ലഭിക്കുമെന്നാണ് കണക്കുകൂട്ടൽ.
ദുബായ് മെട്രോയുടെ 20-ാം വാർ്ഷികത്തോടനുബന്ധിച്ച് 2029 സെപ്റ്റംബർ 9-നാണ് ബ്ലൂ ലൈൻ പൊതുജനങ്ങൾക്കായി തുറന്ന് നൽകാൻ ലക്ഷ്യമിടുന്നത്. ഗതാഗതക്കുരുക്ക് കുറയ്ക്കുന്നതിനൊപ്പം പരിസ്ഥിതി സൗഹൃദ പൊതുഗതാഗതം കൂടുതൽ പ്രോത്സാഹിപ്പിക്കാനും പദ്ധതി സഹായിക്കുമെന്ന് അധികൃതർ വ്യക്തമാക്കി.
ദുബായുടെ ദീർഘകാല നഗര വികസന പദ്ധതിയുടെ ഭാഗമായ ബ്ലൂ ലൈൻ, ഭാവിയിലെ സ്മാർട്ട് സിറ്റിയിലേക്കുള്ള നഗരത്തിന്റെ മുന്നേറ്റത്തിന് കൂടുതൽ കരുത്തേകുമെന്നാണ് വിലയിരുത്തൽ.
