സ്ത്രീകളുടെ മാനസികവും ശാരീരികവുമായ ആരോഗ്യം, സാമ്പത്തിക സുരക്ഷ, കുടുംബ-തൊഴിൽ ഉത്തരവാദിത്തങ്ങൾ എന്നിവ ചർച്ച ചെയ്ത് നാമ വിമൻസ് അഡ്വാൻസ്മെന്റ് സംഘടിപ്പിച്ച നാമ ടോക്സ് 2026 പരമ്പരയ്ക്ക് സമാപനമായി. വർഷം മുഴുവൻ സംഘടിപ്പിച്ച ഏഴ് സെഷനുകളിലായി ഷാർജ എമിറേറ്റിന്റെ വിവിധ ഭാഗങ്ങളിൽ നിന്നുള്ള മുന്നൂറിലധികം സ്ത്രീകളാണ് പങ്കെടുത്തത്.
സ്ത്രീകളുടെ ജീവിതനിലവാരം മെച്ചപ്പെടുത്തുന്നതിനും സാമൂഹിക-സാമ്പത്തിക മേഖലകളിലെ പങ്കാളിത്തം ശക്തിപ്പെടുത്തുന്നതിനും ലക്ഷ്യമിട്ടായിരുന്നു പരിപാടികൾ. ഖോർഫക്കാൻ, കൽബ, അൽ ദൈദ്, അൽ ഹംരിയ തുടങ്ങിയ മേഖലകളിലായി നടന്ന സെഷനുകളിൽ വിദഗ്ധർ സ്ത്രീകളുമായി സംവദിക്കുകയും പ്രായോഗിക നിർദേശങ്ങൾ പങ്കുവെക്കുകയും ചെയ്തു.
സ്ത്രീകളുടെ മാനസികാരോഗ്യം, സാമ്പത്തിക ആസൂത്രണം, സമ്പാദ്യം, നിക്ഷേപം, കുടുംബ-തൊഴിൽ ജീവിതത്തിലെ സന്തുലിതാവസ്ഥ, ആരോഗ്യസംരക്ഷണം തുടങ്ങിയ വിഷയങ്ങൾ ചർച്ചയായി. എമിറാത്തി വനിതാ ദിനത്തോടനുബന്ധിച്ചും സ്തനാർബുദ ബോധവൽക്കരണ മാസത്തോടനുബന്ധിച്ചും പ്രത്യേക സെഷനുകളും സംഘടിപ്പിച്ചു.
നാമ ഡയറക്ടർ ജനറൽ മറിയം അൽ ഹമ്മാദി സ്ത്രീകളുടെ ജീവിതനിലവാരം കുടുംബത്തിന്റെയും സമൂഹത്തിന്റെയും ക്ഷേമവുമായി ഏറെ ബന്ധപ്പെട്ടിരിക്കുslug
ന്നുവെന്ന് വ്യക്തമാക്കി. സ്ത്രീകളുടെ അനുഭവങ്ങൾക്കും അഭിപ്രായങ്ങൾക്കും പ്രാധാന്യം നൽകുന്ന വേദിയാണ് നാമ ടോക്സ് എന്നും അവർ പറഞ്ഞു.
അൽ ദൈദ് സർവകലാശാലയിലും ഷാർജ സർവകലാശാലയിലും വിദ്യാർഥിനികൾക്കായി സംഘടിപ്പിച്ച ‘ബാലൻസ് ആൻഡ് ക്വാളിറ്റി ഓഫ് ലൈഫ്’ സെഷനുകളോടെയാണ് ഈ വർഷത്തെ പരിപാടികൾക്ക് സമാപനമായത്. സ്ത്രീകളുടെ ആരോഗ്യവും ക്ഷേമവും ഉറപ്പാക്കുന്നതിനൊപ്പം സാമൂഹിക-സാമ്പത്തിക വികസനത്തിൽ അവരുടെ സജീവ പങ്കാളിത്തം പ്രോത്സാഹിപ്പിക്കുന്നതിനുള്ള നാമയുടെ പ്രവർത്തനങ്ങളുടെ ഭാഗമായാണ് പദ്ധതി സംഘടിപ്പിച്ചത്.






