മാനിൽ കാർഷിക-മത്സ്യബന്ധന മേഖലയിൽ 3.3% വളർച്ച; ഭക്ഷ്യസുരക്ഷയ്ക്ക് ഊന്നൽ

മസ്‌കത്ത്: ലോക ഭക്ഷ്യദിനത്തോടനുബന്ധിച്ച് സുസ്ഥിര ഭക്ഷ്യസുരക്ഷ ഉറപ്പാക്കുന്നതിനും ആഭ്യന്തര ഉൽപാദനം വർധിപ്പിക്കുന്നതിനും ഊന്നൽ നൽകി ഒമാൻ. 2026-ന്റെ ആദ്യ പകുതിയിൽ രാജ്യത്തെ കാർഷിക-മത്സ്യബന്ധന മേഖലകളിൽ നിന്നുള്ള മൊത്ത ആഭ്യന്തര ഉൽപാദനം 623.5 ദശലക്ഷം ഒമാനി റിയാലിലെത്തി. കഴിഞ്ഞ വർഷത്തെ ഇതേ കാലയളവിലെ 603.6 ദശലക്ഷം റിയാലിനെ അപേക്ഷിച്ച് 3.3 ശതമാനമാണ് വളർച്ച. ‘ഇന്നത്തെ നവീകരണം, നാളത്തെ ഭക്ഷണം’ എന്ന പ്രമേയത്തിൽ കൃഷി, മത്സ്യബന്ധന, ജലവിഭവ മന്ത്രാലയത്തിന്റെ നേതൃത്വത്തിലായിരുന്നു ലോക ഭക്ഷ്യദിനാചരണം. ‘ഒമാൻ വിഷൻ 2040’ ലക്ഷ്യങ്ങൾക്കനുസരിച്ച് ആധുനിക സാങ്കേതികവിദ്യകൾ പ്രയോജനപ്പെടുത്തി ഉൽപാദനശേഷി വർധിപ്പിക്കാനും ഭക്ഷ്യസുരക്ഷ ശക്തിപ്പെടുത്താനുമുള്ള ശ്രമങ്ങൾ രാജ്യം ഊർജിതമാക്കിയിട്ടുണ്ട്. 2021 മുതൽ 2025 വരെ 1.8 ബില്യൺ ഒമാനി റിയാലിലധികം നിക്ഷേപത്തോടെ 493 പദ്ധതികൾ നടപ്പാക്കിയതായും മന്ത്രാലയം വ്യക്തമാക്കി.