ഇന്ത്യൻ ക്രിക്കറ്റ് ടീമിന്റെ സ്റ്റാർ ഓൾറൗണ്ടർ ഹാർദിക് പാണ്ഡ്യയ്ക്ക് പരിക്കിനെത്തുടർന്ന് മാസങ്ങളോളം മത്സരങ്ങളിൽ നിന്ന് വിട്ടുനിൽക്കേണ്ടിവരുമെന്ന് റിപ്പോർട്ട്. അടുത്ത വർഷത്തെ ഐപിഎൽ സീസണിൽ മാത്രമേ താരത്തിന് തിരിച്ചെത്താൻ സാധിക്കൂവെന്നാണ് സൂചന.
കാലിനേറ്റ പരിക്കിൽ നിന്ന് പൂർണമായി മുക്തനാകാത്ത ഹാർദിക് നിലവിൽ ബംഗളൂരുവിലെ ബിസിസിഐ സെന്റർ ഓഫ് എക്സലൻസിൽ ചികിത്സയിലും പുനരധിവാസ പരിശീലനത്തിലുമാണ്. മൂന്നാഴ്ചയ്ക്കുശേഷം ജോഗിങ് ആരംഭിക്കാനും തുടർന്ന് എട്ടാഴ്ചയ്ക്കിടെ പരിശീലനത്തിന്റെ തീവ്രത ക്രമേണ വർധിപ്പിക്കാനുമാണ് പദ്ധതിയെന്നാണ് റിപ്പോർട്ട്. പരിക്ക് പൂർണമായി ഭേദമാകാത്തതിനാൽ ന്യൂസിലൻഡ് പര്യടനത്തിനുള്ള ഇന്ത്യൻ ടീമിൽ ഹാർദിക്കിനെ ഉൾപ്പെടുത്തിയിട്ടില്ല. ശ്രീലങ്കയ്ക്കും സിംബാബ്‌വെയ്ക്കുമെതിരായ പരമ്പരകളും താരത്തിന് നഷ്ടമായേക്കും.
2027ലെ ഏകദിന ലോകകപ്പിന് മുന്നോടിയായി ബാറ്റിങ്ങിലും പേസ് ബൗളിങ്ങിലും ഒരുപോലെ മികവ് പുലർത്തുന്ന ഹാർദിക്കിന്റെ സാന്നിധ്യം ഇന്ത്യൻ ടീമിന് നിർണായകമാണ്. താരത്തിന്റെ അഭാവത്തിൽ നിതീഷ് കുമാർ റെഡ്ഡി ഉൾപ്പെടെയുള്ള ഓൾറൗണ്ടർമാർക്ക് കൂടുതൽ അവസരങ്ങൾ ലഭിച്ചേക്കും.
