എക്‌സാലോജിക്ക് കേസിൽ മുൻ മുഖ്യമന്ത്രി പിണറായി വിജയനും കുടുംബത്തിനുമെതിരായ അന്വേഷണത്തിൽ സംസ്ഥാന സർക്കാരും ആഭ്യന്തര വകുപ്പും സ്വീകരിച്ച നിലപാട് ശരിയാണെന്ന് സുപ്രീം കോടതി വിധിയിലൂടെ തെളിഞ്ഞതായി രമേശ് ചെന്നിത്തല. എൻഫോഴ്‌സ്‌മെന്റ് ഡയറക്ടറേറ്റിന്റെ കത്ത് ലഭിച്ചപ്പോൾ ധൃതിപിടിക്കാതെ പരിശോധിച്ച് നിയമാനുസൃത നടപടികൾ സ്വീകരിക്കാനാണ് സർക്കാർ തീരുമാനിച്ചതെന്ന് അദ്ദേഹം വ്യക്തമാക്കി. എഫ്‌ഐആർ രജിസ്റ്റർ ചെയ്യുന്നതിന് മുമ്പ് പ്രാഥമിക അന്വേഷണം പ്രഖ്യാപിച്ചതും ഇതിന്റെ ഭാഗമായിരുന്നുവെന്നും ചെന്നിത്തല പറഞ്ഞു. എന്നാൽ, പ്രാഥമിക അന്വേഷണം ഒഴിവാക്കി ഉടൻ എഫ്‌ഐആർ രജിസ്റ്റർ ചെയ്യണമെന്ന ഹൈക്കോടതി സിംഗിൾ ബെഞ്ചിന്റെ ഉത്തരവ് സർക്കാർ നടപ്പാക്കുകയായിരുന്നു.
എഫ്‌ഐആർ റദ്ദാക്കാൻ സുപ്രീം കോടതി നിർദേശം നൽകിയിട്ടില്ലെന്നും വിജിലൻസ് എഫ്‌ഐആർ നിലനിൽക്കുകയാണെന്നും ചെന്നിത്തല ചൂണ്ടിക്കാട്ടി. ഹൈക്കോടതി ഡിവിഷൻ ബെഞ്ചിൽ പരാതിക്കാരന് വാദങ്ങൾ ഉന്നയിക്കാൻ അവസരം നൽകുന്നതിനാണ് അന്വേഷണം ഒരാഴ്ചത്തേക്ക് തടഞ്ഞതെന്നും അദ്ദേഹം പറഞ്ഞു. കേസിൽ നിയമം നിയമത്തിന്റെ വഴിക്ക് പോകുമെന്നതാണ് സർക്കാരിന്റെ നിലപാടെന്നും രമേശ് ചെന്നിത്തല വ്യക്തമാക്കി.
