ദുബായ് – ദുബായിൽ നിലനിന്നിരുന്ന 90 ദിവസത്തെ സന്ദർശക വിസ യു.എ.ഇ പൂർണമായും നിർത്തലാക്കി. ദുബായ് ഒഴികെയുള്ള എമിറേറ്റുകളിൽ മാസങ്ങൾക്കു മുൻപുതന്നെ 90 ദിവസ സന്ദർശക വിസ നിർത്തലാക്കിയിരുന്നു. എന്നാൽ ദുബായിൽ നിയമം ബാധകമല്ലായിരുന്നു, ചൊവ്വാഴ്ചമുതൽ ഇത്തരത്തിൽ നിലനിന്നിരുന്ന 90 ദിവസ സന്ദർശക വിസയാണ് നിർത്തിയത്. പക്ഷെ ചൊവ്വാഴ്ച വരെ വിസ ലഭിച്ചവർക്ക് 90 ദിവസം കാലാവധിയുണ്ടാവും.
ദുബായിൽ നേരത്തെ അനുവദിച്ച 90 ദിവസത്തെ വിസയിൽ യു.എ.ഇയിലേക്ക് പ്രവേശിക്കുകയും ചെയ്യാം. അതേസമയം, സന്ദർശക വിസ നിർത്തിയെങ്കിലും ചികിത്സക്ക് എത്തുന്നവർക്ക് 90 ദിവസത്തെ വിസ ലഭിക്കും. തൊഴിലന്വേഷിച്ച് വരുന്നവർക്ക് പുതിയ ‘ജോബ് എക്സ്പ്ലൊറേഷൻ വിസ’യും നടപ്പിലാക്കിയിട്ടുണ്ട്. 60, 90, 120 ദിവസങ്ങളിലേക്കാണ് ഈ വിസ നൽകുന്നത്. എന്നാൽ, 500 ഉന്നത സർവകലാശാലയിൽ പഠിച്ചിറങ്ങിയവർക്കാണ് ഈ വിസ അനുവദിക്കുന്നത്. ഇന്ത്യയിലെ ഐ.ഐ.ടിയിൽ പഠിച്ചവർക്കും ഇത്തരം ജോബ് എക്സ്പ്ലൊറേഷൻ വിസ ലഭിക്കും.
