ദുബൈയിൽ താമസവിസയുമായി ബന്ധപ്പെട്ട പരാതികളും സ്‌പോൺസർഷിപ് തർക്കങ്ങളും ഓൺലൈനായി സമർപ്പിക്കാമെന്ന് ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്‌സ് അഫയേഴ്‌സ്, ജി.ഡി.ആർ.എഫ്.എ ദുബൈ അറിയിച്ചു.
താമസാനുമതി നടപടികളിലെ ബുദ്ധിമുട്ടുകൾ, സ്‌പോൺസറും സ്‌പോൺസർ ചെയ്യപ്പെടുന്ന വ്യക്തിയും തമ്മിലുള്ള തർക്കങ്ങൾ എന്നിവയുമായി ബന്ധപ്പെട്ടാണ് അപേക്ഷകൾ സമർപ്പിക്കാനാകുക.
ലഭിക്കുന്ന പരാതികൾ വിദഗ്ധർ പരിശോധിച്ച് ബന്ധപ്പെട്ടവർക്ക് ആവശ്യമായ മാർഗനിർദേശം നൽകും. നിലവിലുള്ള നിയമങ്ങൾക്കും ചട്ടങ്ങൾക്കും അനുസൃതമായി തർക്കങ്ങൾ പരിഹരിക്കുന്നതിനുള്ള തുടർനടപടികൾക്കും സഹായം ലഭ്യമാക്കുമെന്ന് അധികൃതർ വ്യക്തമാക്കി.
വകുപ്പിന്റെ ഔദ്യോഗിക സമൂഹമാധ്യമ അക്കൗണ്ടിലൂടെയാണ് അപേക്ഷാ നടപടികളെക്കുറിച്ചുള്ള വിവരം പങ്കുവെച്ചത്.
