പരിസ്ഥിതി സംരക്ഷണത്തിൽ പുതിയൊരു ചുവടുവെപ്പുമായി യുഎഇ. വസ്ത്രമാലിന്യങ്ങൾ കുറയ്ക്കുക എന്ന ലക്ഷ്യത്തോടെ യുഎഇ സർക്കാർ ആവിഷ്കരിച്ച പുതിയ പദ്ധതിയാണ് ‘നസീജ്’.
പഴയ വസ്ത്രങ്ങൾ വെറുതെ കളയുന്നതിന് പകരം, അവ പുനരുപയോഗം ചെയ്ത് പുതിയ ഉൽപ്പന്നങ്ങളാക്കി മാറ്റുകയാണ് ഈ പദ്ധതിയുടെ പ്രധാന ലക്ഷ്യം. സാമ്പത്തിക-ടൂറിസം മന്ത്രാലയം, എമിറേറ്റ്സ് ഫൗണ്ടേഷൻ, തദ്‌വീർ ഗ്രൂപ്പ് എന്നിവർ ചേർന്നാണ് ഈ പദ്ധതിക്ക് രൂപം നൽകിയിരിക്കുന്നത്. വസ്ത്ര നിർമ്മാണ രംഗത്തെ കമ്പനികളെയും വിപണനക്കാരെയും ഒന്നിപ്പിച്ചുകൊണ്ട്, ഫാഷൻ മേഖലയിലെ മാലിന്യം പൂർണ്ണമായും ഒഴിവാക്കാനാണ് നസീജ് എന്ന പദ്ധതിയിലൂടെ ലക്ഷ്യമിടുന്നത്.
ഉപയോഗശൂന്യമായ വസ്ത്രങ്ങൾ ശേഖരിക്കാനും അവയിൽ നിന്ന് പുതിയ നൂലുകൾ നിർമ്മിക്കാനുമുള്ള സംവിധാനങ്ങൾ ഇതിന്റെ ഭാഗമായി ഒരുക്കും. പരിസ്ഥിതി ബോധമുള്ള ഒരു വസ്ത്രധാരണ രീതി വളർത്താൻ സഹായിക്കുന്ന ഈ സംരംഭം, ഭൂമിയെ സംരക്ഷിക്കാനുള്ള യുഎഇയുടെ വലിയൊരു കരുതൽ കൂടിയാണ്.
