ോഗർമാരും സെൽഫി പ്രേമികളും ഒക്കെ ഒന്ന് ശ്രദ്ധിക്കുക! യുഎഇ ഉൾപ്പെടെയുള്ള ഗൾഫ് രാജ്യങ്ങളിൽ നിന്ന് ഇന്ത്യയിലേക്ക് യാത്ര ചെയ്യുന്ന പ്രവാസികൾക്കും വിനോദസഞ്ചാരികൾക്കും, വിമാനത്താവളങ്ങളിലെ സുരക്ഷാ മേഖലകളിൽ വെച്ച് സെൽഫികളോ, വ്ലോഗുകളോ, റീലുകളോ ചിത്രീകരിക്കുന്നതിന് ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (DGCA) കർശനമായ വിലക്കാണ് ഏർപ്പെടുത്തിയിട്ടുള്ളത്.
സുരക്ഷാ പരിശോധനാ കേന്ദ്രങ്ങൾ, ബോർഡിങ് ഗേറ്റുകൾ, റൺവേ ബസുകൾ, വിമാനങ്ങൾ പാർക്ക് ചെയ്യുന്ന അപ്രോൺ തുടങ്ങിയ നിയന്ത്രിത മേഖലകളിൽ അനുമതിയില്ലാതെ ദൃശ്യങ്ങൾ പകർത്തിയാൽ കർശനമായ നിയമനടപടികൾ നേരിടേണ്ടി വരും. ഇൻസ്റ്റാഗ്രാം, യൂട്യൂബ് തുടങ്ങിയ പ്ലാറ്റ്‌ഫോമുകൾക്കായി ചിത്രീകരിക്കുന്ന സാധാരണ വീഡിയോകൾ പോലും വിമാനത്താവളങ്ങളിലെ സുരക്ഷാ ക്രമീകരണങ്ങളുടെയും ക്യാമറകളുടെയും വിവരങ്ങൾ ചോരാൻ ഇടയാക്കുമെന്ന സുരക്ഷാ വിലയിരുത്തലിന്റെ അടിസ്ഥാനത്തിലാണ് ഈ ജാഗ്രതാ നിർദ്ദേശം. സുരക്ഷാ ഉദ്യോഗസ്ഥരുടെ നിർദ്ദേശങ്ങൾ ലംഘിച്ച് നിയമലംഘനം നടത്തിയാൽ യാത്രാവിലക്ക് വരെ ഉണ്ടാകാം.
അതേസമയം, ചെക്ക്-ഇൻ ഹാളുകൾ, ഫുഡ് കോർട്ടുകൾ തുടങ്ങിയ പൊതുയിടങ്ങളിൽ സാധാരണ ചിത്രീകരണങ്ങൾക്ക് തടസ്സമില്ലെങ്കിലും, കൊമേഴ്‌സ്യൽ അല്ലെങ്കിൽ പ്രൊഫഷണൽ ഷൂട്ടുകൾക്ക് മുൻകൂട്ടി അനുമതി വാങ്ങുന്നത് നിർബന്ധമാക്കിയിട്ടുണ്ട്. അതിനാൽ യാത്ര ചെയ്യുന്ന പ്രവാസികളും വിനോദസഞ്ചാരികളും വിമാനത്താവളങ്ങളിലെ സുരക്ഷാ നിയമങ്ങൾ കൃത്യമായി പാലിച്ചു കൊണ്ട് യാത്ര സുരക്ഷിതമാക്കുക.
