ഷാർജ: നഗരത്തിലെ പ്രമുഖ സാംസ്കാരിക, മത, വിനോദസഞ്ചാര കേന്ദ്രങ്ങളെ ബന്ധിപ്പിച്ച് ഭൂഗർഭ നടപ്പാത നിർമിക്കാൻ ഷാർജയിൽ തുടക്കം. കൾച്ചറൽ സ്ക്വയറിലെ ഇമാം അഹമ്മദ് ബിൻ ഹൻബൽ പള്ളിയെയും സമീപ പ്രദേശങ്ങളെയും ബന്ധിപ്പിക്കുന്ന നടപ്പാതയുടെ നിർമാണപ്രവർത്തനങ്ങളാണ് ആരംഭിച്ചത്.
വാഹനഗതാഗതത്തിനും കൾച്ചറൽ സ്ക്വയറിലെ മനോഹരമായ പൂന്തോട്ടങ്ങൾക്കും തടസ്സമുണ്ടാക്കാതെ കാൽനടയാത്രക്കാർക്ക് സുരക്ഷിതമായി റോഡ് മുറിച്ചുകടക്കാൻ പുതിയ പാത സഹായിക്കും. ആരാധകർക്കും വിനോദസഞ്ചാരികൾക്കും ഒരുപോലെ പ്രയോജനപ്പെടുന്ന രീതിയിലാണ് പദ്ധതി വിഭാവനം ചെയ്തിരിക്കുന്നത്. പ്രദേശത്തെ മനോഹരമായ കാഴ്ചകൾ സുരക്ഷിതമായി ആസ്വദിക്കാനും ചിത്രങ്ങൾ പകർത്താനും സന്ദർശകർക്ക് ഇതിലൂടെ കൂടുതൽ സൗകര്യമൊരുങ്ങും.
ഷാർജ റേഡിയോ ആൻഡ് ടെലിവിഷൻ അതോറിറ്റിയുടെ ‘ഡയറക്ട് ലൈൻ’ പരിപാടിയിൽ ഫോണിലൂടെ സംസാരിക്കവെയാണ് സുപ്രീം കൗൺസിൽ അംഗവും ഷാർജ ഭരണാധികാരിയുമായ ഷെയ്ഖ് ഡോ. സുൽത്താൻ ബിൻ മുഹമ്മദ് അൽ ഖാസിമി പദ്ധതിയെക്കുറിച്ച് പ്രഖ്യാപിച്ചത്.
കൾച്ചറൽ സ്ക്വയറിലെ ഖുർആൻ സ്മാരകം മുസ്‌ലിം ലോകത്തിന് വഴികാട്ടുന്ന പ്രധാന അടയാളമാണെന്നും അദ്ദേഹം വ്യക്തമാക്കി. ഈ പ്രദേശത്തെ ‘ഖുർആൻ സ്ക്വയർ’ എന്നോ ‘ബുക്ക് സ്ക്വയർ’ എന്നോ വിശേഷിപ്പിക്കാമെന്നും ഷാർജ ഭരണാധികാരി കൂട്ടിച്ചേർത്തു.
നഗരത്തിന്റെ സാംസ്കാരിക പൈതൃകം സംരക്ഷിക്കുന്നതിനൊപ്പം സന്ദർശകരുടെ സുരക്ഷയും സൗകര്യവും മെച്ചപ്പെടുത്തുന്നതിൽ പുതിയ ഭൂഗർഭ നടപ്പാത നിർണായകമാകുമെന്നാണ് പ്രതീക്ഷ.
