ദുബായ്: യുഎഇയിലെ ചെറുകിട, ഇടത്തരം സംരംഭങ്ങൾക്കായുള്ള ഡിജിറ്റൽ ധനകാര്യ സേവനങ്ങൾ വിപുലീകരിക്കാൻ ലുലു ഫിനാൻഷ്യൽ ഹോൾഡിംഗ്‌സും ധനകാര്യ സാങ്കേതികവിദ്യാ കമ്പനിയായ പർപ്പിൾപ്ലമ്മും കൈകോർക്കുന്നു. ബിസിനസ് അക്കൗണ്ടുകൾ മുതൽ രാജ്യാന്തര പണമിടപാടുകളും ശമ്പള വിതരണവും വരെയുള്ള സേവനങ്ങൾ ഒരൊറ്റ ഡിജിറ്റൽ പ്ലാറ്റ്‌ഫോമിൽ ലഭ്യമാക്കുകയാണ് ലക്ഷ്യം.
പങ്കാളിത്തത്തിന്റെ ഭാഗമായി പർപ്പിൾപ്ലമ്മിന്റെ സാങ്കേതികവിദ്യ ലുലു മണി ബിസിനസ് പ്ലാറ്റ്‌ഫോമുമായി സംയോജിപ്പിക്കും. ഇതിലൂടെ നിലവിലുള്ള ബാങ്കിംഗ് സംവിധാനങ്ങളെയും പേയ്‌മെന്റ് സേവനങ്ങളെയും ബന്ധിപ്പിച്ച് ബിസിനസുകളുടെ സാമ്പത്തിക ഇടപാടുകൾ കൂടുതൽ ലളിതമാക്കാനാകും.
ഡിജിറ്റൽ ബിസിനസ് അക്കൗണ്ടുകൾ, പേയ്‌മെന്റുകൾ, കാർഡുകൾ, രാജ്യാന്തര പണമിടപാടുകൾ, വേതന സംരക്ഷണ സംവിധാനം അഥവാ ഡബ്ല്യുപിഎസ്, ശമ്പള വിതരണ സേവനങ്ങൾ എന്നിവയാണ് ആദ്യഘട്ടത്തിൽ ലഭ്യമാക്കുന്നത്. യുഎഇ സെൻട്രൽ ബാങ്കിന്റെ ലൈസൻസുള്ള ഇസ്ലാമിക് ബാങ്കായ റുയയുടെ ഡിജിറ്റൽ ബിസിനസ് അക്കൗണ്ട് സേവനങ്ങളും ഇതിന്റെ ഭാഗമാണ്. അക്കൗണ്ട് തുറക്കുന്നതിനുള്ള നടപടികൾ വേഗത്തിലാക്കാൻ ആർട്ടിഫിഷ്യൽ ഇന്റലിജൻസ് അധിഷ്ഠിത സാങ്കേതികവിദ്യയും ഉപയോഗിക്കും.
ലുലു ഫിനാൻഷ്യൽ ഹോൾഡിംഗ്‌സ് മാനേജിംഗ് ഡയറക്ടർ അദീബ് അഹമ്മദും പർപ്പിൾപ്ലമ്മിന്റെ സഹസ്ഥാപകരായ കല്യാൺ കാർത്തിക് സദാശിവുനിയും സായ് സന്ദീപ് സദാശിവുനിയും ഉൾപ്പെടെയുള്ള മുതിർന്ന ഉദ്യോഗസ്ഥരുടെ സാന്നിധ്യത്തിലാണ് പങ്കാളിത്തം പ്രഖ്യാപിച്ചത്.
യുഎഇയിലെ കമ്പനികളിൽ ഏകദേശം 95 ശതമാനവും ചെറുകിട, ഇടത്തരം സംരംഭങ്ങളാണെന്നാണ് കണക്ക്. ഈ മേഖലയ്ക്ക് കൂടുതൽ സമഗ്രമായ ധനകാര്യ സേവനങ്ങൾ ലഭ്യമാക്കുന്നതിലൂടെ ബിസിനസുകളുടെ വളർച്ചയ്ക്കും സാമ്പത്തിക ഇടപാടുകളുടെ കാര്യക്ഷമത വർധിപ്പിക്കുന്നതിനും സഹായിക്കാനാകുമെന്നാണ് പ്രതീക്ഷ.
ഭാവിയിൽ പ്രവർത്തന മൂലധന വായ്പകൾ, ഇൻവോയ്സ്, വ്യാപാര ധനസഹായം, കോർപ്പറേറ്റ് വായ്പകൾ, അക്കൗണ്ടിംഗ് സംവിധാനങ്ങൾ, ധനകാര്യ പ്രവർത്തനങ്ങളുടെ ഓട്ടോമേഷൻ തുടങ്ങിയ സേവനങ്ങളും ലുലു മണി ബിസിനസിലൂടെ ലഭ്യമാക്കാൻ പദ്ധതിയുണ്ട്.
യുഎഇയെ പ്രാദേശിക പ്രവർത്തനങ്ങളുടെ കേന്ദ്രമാക്കി, ജിസിസി രാജ്യങ്ങൾ, ഇന്ത്യ, ഏഷ്യ-പസഫിക് മേഖലകൾ എന്നിവിടങ്ങളിലേക്കും സേവനങ്ങൾ വ്യാപിപ്പിക്കാനുള്ള സാധ്യതയും ഈ സാങ്കേതിക പങ്കാളിത്തം തുറന്നിടുന്നു.
ഡിജിറ്റൽ ബാങ്കിംഗ് സേവനങ്ങളെ കൂടുതൽ ലളിതവും പരസ്പരം ബന്ധിപ്പിച്ചതുമായ സംവിധാനത്തിലേക്ക് മാറ്റുന്നതിനൊപ്പം, ചെറുകിട-ഇടത്തരം സംരംഭങ്ങളുടെ ദൈനംദിന ധനകാര്യ ആവശ്യങ്ങൾക്ക് സമഗ്രമായ ഡിജിറ്റൽ പരിഹാരം ഒരുക്കുകയാണ് ലുലു ഫിനാൻഷ്യൽ ഹോൾഡിംഗ്‌സും പർപ്പിൾപ്ലമ്മും ലക്ഷ്യമിടുന്നത്.
