ന്യൂയോർക്ക്: ഐക്യരാഷ്ട്രസഭയുടെ അടുത്ത സെക്രട്ടറി ജനറൽ സ്ഥാനത്തേക്കുള്ള യു.എ.ഇ നയതന്ത്ര പ്രതിനിധി ലാ നുസൈബെയുടെ സ്ഥാനാർഥിത്വത്തിന് രാജ്യാന്തര പിന്തുണയേറുന്നു. സൈപ്രസും മാലിദ്വീപും പിന്തുണ പ്രഖ്യാപിച്ചതോടെ സ്ഥാനാർഥിത്വം കൂടുതൽ ശ്രദ്ധ നേടുകയാണ്.
നയതന്ത്ര ചർച്ചകളിലൂടെയും സംഭാഷണങ്ങളിലൂടെയും പ്രശ്നങ്ങൾ പരിഹരിക്കാൻ കഴിവുള്ള വ്യക്തിത്വമാണ് ലാ നുസൈബെയെന്ന് സൈപ്രസ് വിദേശകാര്യ മന്ത്രി കോൺസ്റ്റാന്റിനോസ് കൊമ്പോസ് വ്യക്തമാക്കി. ഐക്യരാഷ്ട്രസഭയെ നയിക്കാൻ ഒരു വനിത എത്തേണ്ട സമയം അതിക്രമിച്ചെന്നും അദ്ദേഹം അഭിപ്രായപ്പെട്ടു.
നേരത്തേ ഗൾഫ് സഹകരണ കൗൺസിൽ രാജ്യങ്ങളും ലാ നുസൈബെയ്ക്ക് ഏകകണ്ഠ പിന്തുണ പ്രഖ്യാപിച്ചിരുന്നു. ബഹുരാഷ്ട്ര സഹകരണം ശക്തിപ്പെടുത്തുന്നതിനും ആഗോള സമാധാനത്തിൽ ഐക്യരാഷ്ട്രസഭയുടെ പങ്ക് ഉറപ്പാക്കുന്നതിനുമുള്ള പ്രതിബദ്ധതയാണ് ഈ പിന്തുണയ്ക്ക് പിന്നിലെന്ന് ജി.സി.സി ജനറൽ സെക്രട്ടറി ജാസെം മുഹമ്മദ് അൽബുദൈവി വ്യക്തമാക്കി.
2013 മുതൽ 2024 വരെ യു.എ.ഇയുടെ ഐക്യരാഷ്ട്രസഭയിലെ സ്ഥിരം പ്രതിനിധിയായി സേവനമനുഷ്ഠിച്ച ലാ നുസൈബെ, വിദേശകാര്യ സഹമന്ത്രി പദവിയും വഹിച്ചിട്ടുണ്ട്. നിലവിൽ യു.എൻ വിമൻ എക്സിക്യൂട്ടീവ് ബോർഡ് പ്രസിഡന്റാണ് അവർ.
വിഭജനങ്ങൾ കുറയ്ക്കുന്നതിനും കൂടുതൽ കാര്യക്ഷമവും സുതാര്യവുമായ രീതിയിൽ ആഗോള പ്രശ്നങ്ങൾ പരിഹരിക്കുന്നതിനും മുൻഗണന നൽകുമെന്നാണ് സ്ഥാനാർഥിത്വം പ്രഖ്യാപിച്ചുകൊണ്ട് ലാ നുസൈബെ വ്യക്തമാക്കിയത്.
നിലവിലെ സെക്രട്ടറി ജനറൽ അന്റോണിയോ ഗുട്ടെറസിന്റെ കാലാവധി അവസാനിക്കുന്ന സാഹചര്യത്തിലാണ് പിൻഗാമിയെ കണ്ടെത്താനുള്ള നടപടികൾ പുരോഗമിക്കുന്നത്. കോസ്റ്റാറിക്കയുടെ മുൻ വൈസ് പ്രസിഡന്റ് റെബേക്ക ഗ്രിൻസ്പാൻ, അന്താരാഷ്ട്ര ആണവോർജ ഏജൻസി മേധാവി റാഫേൽ ഗ്രോസി എന്നിവരും മത്സരരംഗത്തുണ്ട്. ഐക്യരാഷ്ട്രസഭയുടെ ചരിത്രത്തിൽ ഇതുവരെ ഒരു വനിതയും സെക്രട്ടറി ജനറൽ പദവിയിലെത്തിയിട്ടില്ല. അതിനാൽ ലാ നുസൈബെയുടെ സ്ഥാനാർഥിത്വം ആഗോളതലത്തിൽ ഏറെ ശ്രദ്ധ നേടുകയാണ്.
