കൊച്ചി: ചേരാനല്ലൂരിൽ 17കാരൻ ഓടിച്ച ബെൻസ് കാറിടിച്ച് സ്കൂട്ടർ യാത്രികൻ മരിച്ച സംഭവത്തിൽ കൗമാരക്കാരന്റെ മൊഴി പുറത്ത്. കാർ ഓടിക്കാനുള്ള ആഗ്രഹം കൊണ്ടാണ് വീട്ടുകാരറിയാതെ വാഹനവുമായി പുറത്തിറങ്ങിയതെന്നാണ് മൊഴി. അപകടസമയത്ത് ശക്തമായ മഴയായിരുന്നതിനാൽ റോഡിലൂടെ സഞ്ചരിച്ചിരുന്ന സ്കൂട്ടർ വ്യക്തമായി കാണാൻ കഴിഞ്ഞില്ലെന്നും 17കാരൻ പൊലീസിനോട് പറഞ്ഞു.
മാഞ്ഞാലി സ്വദേശി ജയബാലകൃഷ്ണൻ (56) ആണ് അപകടത്തിൽ മരിച്ചത്. ആലുവയിലെ ഫ്ലാറ്റിൽനിന്ന് വീട്ടുകാരറിയാതെയാണ് ഇരിങ്ങാലക്കുട കോടതി ജഡ്ജി റിനോ ഫ്രാൻസിസിന്റെ മകൻ കാറുമായി പുറത്തുപോയതെന്നാണ് വിവരം.
പുലർച്ചെ മൂന്ന് മണിയോടെയായിരുന്നു അപകടം. ചിറ്റൂരിനടുത്ത് തട്ടുകട നടത്തുന്ന ജയബാലകൃഷ്ണൻ രാത്രി കടയടച്ച് സ്കൂട്ടറിൽ വീട്ടിലേക്ക് മടങ്ങുന്നതിനിടെ അമിതവേഗത്തിലെത്തിയ ബെൻസ് കാർ പിന്നിൽനിന്ന് ഇടിക്കുകയായിരുന്നു. ഇടിയുടെ ആഘാതത്തിൽ സ്കൂട്ടർ തകരുകയും ജയബാലകൃഷ്ണൻ റോഡിലേക്ക് തെറിച്ചുവീഴുകയുമായിരുന്നു.
സംഭവത്തിൽ ഭാരതീയ ന്യായ സംഹിതയിലെ സെക്ഷൻ 281, സെക്ഷൻ 106(1) എന്നിവ പ്രകാരം പൊലീസ് കേസെടുത്തിട്ടുണ്ട്. പൊതുവഴിയിൽ അശ്രദ്ധമായി വാഹനമോടിച്ചതിനും അശ്രദ്ധമൂലം മരണത്തിന് കാരണമായതിനുമാണ് വകുപ്പുകൾ ചുമത്തിയിരിക്കുന്നത്.
