ന്യൂഡൽഹി: ഇന്ത്യയിൽ നടക്കാനിരിക്കുന്ന ബ്രിക്സ് പാർലമെന്ററി സമ്മേളനത്തിൽ ഇറാൻ പാർലമെന്റ് സ്പീക്കർ മുഹമ്മദ് ബാഖർ ഖാലിബാഫ് പങ്കെടുക്കില്ല. അപ്രതീക്ഷിത സാഹചര്യങ്ങളെത്തുടർന്നാണ് സന്ദർശനം റദ്ദാക്കിയതെന്ന് ന്യൂഡൽഹിയിലെ ഇറാൻ എംബസി അറിയിച്ചു. എന്നാൽ ഇറാനിൽനിന്നുള്ള പാർലമെന്ററി പ്രതിനിധിസംഘം സമ്മേളനത്തിൽ പങ്കെടുക്കും.
ഒക്ടോബർ 26, 27 തീയതികളിൽ ന്യൂഡൽഹിയിലെ സംവിധാൻ സദനിലാണ് 12-ാമത് ബ്രിക്സ് പാർലമെന്ററി സമ്മേളനം നടക്കുന്നത്. ഖാലിബാഫും സമ്മേളനത്തിൽ പങ്കെടുക്കുമെന്ന് നേരത്തെ അറിയിച്ചിരുന്നെങ്കിലും സമ്മേളനം ആരംഭിക്കാൻ രണ്ടുദിവസം മാത്രം ശേഷിക്കെയാണ് സന്ദർശനം റദ്ദാക്കിയ വിവരം പുറത്തുവന്നത്.
തീരുമാനത്തിന് പിന്നിലെ കൂടുതൽ വിശദാംശങ്ങൾ ഇറാൻ എംബസി വെളിപ്പെടുത്തിയിട്ടില്ല. അതേസമയം, ബ്രിക്സ് കൂട്ടായ്മയിലെ അംഗരാജ്യമെന്ന നിലയിൽ സമ്മേളനത്തിൽ സജീവമായ പങ്കാളിത്തം തുടരുമെന്ന് ഇറാൻ വ്യക്തമാക്കി.
സമ്മേളനത്തിനെത്തുന്ന ഇറാന്റെ പ്രതിനിധിസംഘം മറ്റ് അംഗരാജ്യങ്ങളിലെ പ്രതിനിധികളുമായി ഉഭയകക്ഷി, ബഹുകക്ഷി സഹകരണം ശക്തിപ്പെടുത്തുന്നതിനെക്കുറിച്ച് ചർച്ചകൾ നടത്തും.
ഇന്ത്യയുടെ അധ്യക്ഷതയിൽ നടക്കുന്ന സമ്മേളനത്തിൽ ആഗോള ഭരണസംവിധാനങ്ങളുടെ പരിഷ്കരണം, നിർമിതബുദ്ധിയുടെ ധാർമിക ഉപയോഗം, ഡിജിറ്റൽ പരിവർത്തനം, സുസ്ഥിര വികസനം, പാർലമെന്ററി സഹകരണം തുടങ്ങിയ വിഷയങ്ങളാണ് പ്രധാനമായും ചർച്ച ചെയ്യുക. പ്രധാനമന്ത്രി നരേന്ദ്ര മോദിയും സമ്മേളനത്തിൽ പങ്കെടുക്കുമെന്ന് ലോക്സഭ സ്പീക്കർ ഓം ബിർള നേരത്തെ അറിയിച്ചിരുന്നു.
