കൊച്ചി: രാജ്യാന്തര വിപണിയിൽ സ്വർണവില കുത്തനെ ഇടിഞ്ഞിട്ടും കേരളത്തിൽ സ്വർണവിലയിൽ നേരിയ വർധന. ഗ്രാമിന് 10 രൂപ ഉയർന്ന് 13,070 രൂപയും പവന് 80 രൂപ വർധിച്ച് 1,04,560 രൂപയുമായി. 18 കാരറ്റ് സ്വർണവില ഗ്രാമിന് 10,695 രൂപയാണ്. വെള്ളിവിലയിൽ മാറ്റമില്ല; ഗ്രാമിന് 220 രൂപ.
രാജ്യാന്തര വിപണിയിൽ സെപ്റ്റംബർ 23ന് ഔൺസിന് 4,371 ഡോളറായിരുന്ന സ്വർണവില ഇപ്പോൾ 3,995 ഡോളറിനടുത്തേക്ക് താഴ്ന്നു. ഒരുഘട്ടത്തിൽ 3,978 ഡോളർ വരെയുമെത്തി. രാജ്യാന്തരവില താഴുമ്പോഴും കേരളത്തിൽ വില ഉയർന്നത് വിപണിയിൽ ശ്രദ്ധേയമായി.
ക്രൂഡോയിൽ വിലയിലെ കുതിപ്പ്, യുഎസ് ഡോളർ സൂചികയിലെയും ബോണ്ട് യീൽഡിലെയും മുന്നേറ്റം എന്നിവയാണ് സ്വർണവിലയെ സമ്മർദത്തിലാക്കുന്നത്. പശ്ചിമേഷ്യയിലെ സംഘർഷസാധ്യതകൾക്കിടെ ബ്രെന്റ് ക്രൂഡ് വില 117 ഡോളറിനടുത്തെത്തിയതും വിപണിയെ സ്വാധീനിച്ചു. പണപ്പെരുപ്പവും പലിശനിരക്കും ഉയരുമെന്ന ആശങ്കകൾ സ്വർണ നിക്ഷേപത്തെയും ബാധിക്കുന്നുണ്ട്.
വിൽപ്പന സമ്മർദം തുടർന്നാൽ രാജ്യാന്തര സ്വർണവില ഔൺസിന് 3,930–3,940 ഡോളറിലേക്ക് താഴാമെന്നാണ് ചില വിശകലന വിദഗ്ധരുടെ വിലയിരുത്തൽ. അങ്ങനെ സംഭവിച്ചാൽ കേരളത്തിൽ പവൻവിലയിൽ 1,000 രൂപയിലധികം കുറവുണ്ടാകാൻ സാധ്യതയുണ്ട്. മറുവശത്ത്, യുദ്ധസാഹചര്യങ്ങൾ ശമിക്കുകയും എണ്ണവില താഴുകയും ചെയ്താൽ സ്വർണവില തിരിച്ചുകയറാനും സാധ്യതയുണ്ട്.
2026 ജനുവരിയിൽ രാജ്യാന്തര സ്വർണവില ഔൺസിന് 5,608.35 ഡോളറിലെത്തിയിരുന്നു. അന്നത്തെ കേരളത്തിലെ പവൻവില 1,31,160 രൂപയായിരുന്നു. ഇപ്പോഴത്തെ വിലയിടിവ് ആഭരണം വാങ്ങാൻ ഒരുങ്ങുന്നവർക്ക് ആശ്വാസമാകുമ്പോൾ, സ്വർണത്തിൽ നിക്ഷേപിച്ചവർക്കും സ്വർണം വിറ്റ് അടിയന്തര ആവശ്യങ്ങൾ നിറവേറ്റാൻ ഉദ്ദേശിക്കുന്നവർക്കും തിരിച്ചടിയാണ്.
