ദുബായ്: യു.എ.ഇയിലെ പ്രമുഖ റിയൽ എസ്റ്റേറ്റ് സ്ഥാപനങ്ങളിലൊന്നായ സിമ്പോളിക് ഡവലപ്‌മെന്‍റ്‌സ് ഉപഭോക്താക്കളെ ലക്ഷ്യമിട്ട് പുതിയ പ്രമോഷണൽ ഓഫർ അവതരിപ്പിച്ചു. മേയ് 1 മുതൽ 31 വരെ സിമ്പോളിക് സെൻ റസിഡൻസിൽ യൂണിറ്റ് ബുക്ക് ചെയ്യുന്നവർക്ക് ജെറ്റൂർ ടി2 എസ്‌യുവി സൗജന്യമായി നൽകുമെന്ന് കമ്പനി അറിയിച്ചു.
എലൈറ്റ് ഗ്രൂപ്പ് ഹോൾഡിങ്‌സുമായി സഹകരിച്ചാണ് പദ്ധതി നടപ്പാക്കുന്നത്. ജെറ്റൂർ വാഹനങ്ങളുടെ ഔദ്യോഗിക വിതരണക്കാരായ എലൈറ്റ് ഗ്രൂപ്പുമായി ദുബൈ ആസ്ഥാനത്ത് നടന്ന ചടങ്ങിൽ ധാരണാപത്രം ഒപ്പുവെച്ചു. സിമ്പോളിക് ഡവലപ്‌മെന്‍റ്‌സ് വൈസ് ചെയർമാൻ മുർതസ മോയിസും എലൈറ്റ് ഗ്രൂപ്പ് ഹോൾഡിങ്‌സ് സി.എഫ്.ഒ ഹാറൂൺ ഹയാത്തും കരാറിൽ ഒപ്പുവെച്ചു.
‘One Investment, Two Keys’ എന്ന ആശയത്തോടെയാണ് ഓഫർ പ്രഖ്യാപിച്ചിരിക്കുന്നത്. ഒരൊറ്റ നിക്ഷേപത്തിലൂടെ താമസ സൗകര്യത്തിനൊപ്പം വാഹനവും സ്വന്തമാക്കാനുള്ള അവസരമാണിതിലൂടെ ഉപഭോക്താക്കൾക്ക് ലഭിക്കുന്നത്.
ദുബൈയിലെ അൽ ഫർജാനിൽ വികസിപ്പിക്കുന്ന സിമ്പോളിക് സെൻ റസിഡൻസ് കമ്പനിയുടെ പുതിയ റെസിഡൻഷ്യൽ പദ്ധതികളിലൊന്നാണ്. രണ്ട് മുതൽ അഞ്ച് ബെഡ്‌റൂം വരെയുള്ള അപ്പാർട്ട്‌മെന്റുകളാണ് പദ്ധതിയിൽ ഉൾപ്പെടുത്തിയിട്ടുള്ളത്. കുടുംബങ്ങൾക്കും നിക്ഷേപകർക്കും ഒരുപോലെ അനുയോജ്യമായ താമസസൗകര്യങ്ങളാണ് ഇവിടെ ഒരുക്കുന്നതെന്ന് കമ്പനി അധികൃതർ വ്യക്തമാക്കി.
