അയൽരാജ്യങ്ങളിൽനിന്ന് വ്യാജമായി ലൈസൻസുകൾ തരപ്പെടുത്തി യു.എ.ഇ ഡ്രൈവിങ് ലൈസൻസുകളിലേക്ക് മാറ്റിയെടുത്ത എട്ടംഗ സംഘത്തെ ദുബൈ പൊലീസ് പിടികൂടി. പരീക്ഷകളോ പരിശീലനമോ ഇല്ലാതെ വിദേശ ലൈസൻസുകൾ യു.എ.ഇ ലൈസൻസുകളാക്കി മാറ്റാനുള്ള അന്താരാഷ്ട്ര കരാറുകളെ ദുരുപയോഗം ചെയ്താണ് സംഘം തട്ടിപ്പ് നടത്തിയത്. ഒരു ലൈസൻസിന് പതിനായിരം ദിർഹം വീതമാണ് പ്രതികൾ ഈടാക്കിയിരുന്നത്. ദുബൈ പൊലീസിന്റെ ക്രിമിനൽ ഇൻവെസ്റ്റിഗേഷൻ ഡിപ്പാർട്മെന്റ്, വിദേശകാര്യ മന്ത്രാലയം, റോഡ്സ് ആൻഡ് ട്രാൻസ്പോർട്ട് അതോറിറ്റി എന്നിവ സംയുക്തമായാണ് തട്ടിപ്പ് സംഘത്തെ പിടികൂടിയത്.
നിയമപരമായ പരിശീലനങ്ങളും പരീക്ഷകളും ഒഴിവാക്കി ലൈസൻസ് നേടുന്നത് പൊതുറോഡുകളുടെ സുരക്ഷയ്ക്ക് ഭീഷണിയാണെന്ന് പൊലീസ് വ്യക്തമാക്കി. വ്യാജ ലൈസൻസുകൾ പണം നൽകി സ്വന്തമാക്കുന്നവർക്കെതിരെയും കർശന നിയമനടപടികളും പിഴയും ഉണ്ടാകുമെന്ന് അധികൃതർ മുന്നറിയിപ്പ് നൽകി. അംഗീകൃത സ്ഥാപനങ്ങൾ വഴി ഔദ്യോഗിക നടപടിക്രമങ്ങൾ പാലിച്ച് മാത്രം ഡ്രൈവിങ് ലൈസൻസ് നേടണമെന്നും ഇത്തരം നിയമവിരുദ്ധ പ്രവർത്തനങ്ങൾ ശ്രദ്ധയിൽപ്പെട്ടാൽ അധികൃതരെ അറിയിക്കണമെന്നും ദുബൈ പൊലീസ് പൊതുജനങ്ങളോട് അഭ്യർഥിച്ചു.
