ദുബായ് – അമേരിക്കൻ വ്യാപാര മാസികയായ ഫോബ്സ് മാഗസിന്‍റെ ഇന്ത്യയിലെ കോടീശ്വരൻമാരുടെ പട്ടിക പ്രസിദ്ധീകരിച്ചപ്പോൾ മുകേഷ് അംബാനിയെ മറികടന്ന് ഗൗതം അദാനി ഒന്നാമനായി ഇടം പിടിച്ചു. 2021ൽ 7,480 കോടി ഡോളർ ആസ്തിയുണ്ടായിരുന്ന അദാനി ഒറ്റ വർഷം കൊണ്ട് ഇരട്ടിയാക്കിയാണ് (15,000 കോടി ഡോളർ) ഒന്നാമതെത്തിയത്. മുകേഷ് അംബാനി (8,800 കോടി ഡോളർ), രാധാകിഷൻ ദമാനി (2,760 കോടി ഡോളർ), സൈറസ് പൂനവല്ല (2,150 കോടി ഡോളർ), ഷിവ് നാടാർ (2,140 കോടി ഡോളർ) എന്നിവരാണ് ഇന്ത്യയിൽ നിന്നുള്ള ആദ്യ അഞ്ച് പേർ.
എന്നാൽ മലയാളികളിൽ എം.എ. യൂസുഫലിയാണ് ഒന്നാമൻ, 540 കോടി ഡോളർ ആസ്ഥിയുള്ള യൂസുഫലിക്കൊപ്പം മറ്റു അഞ്ച് മലയാളികൾ കൂടി പട്ടികയിൽ ഇടംപിടിച്ചിട്ടുണ്ട്. മൂത്തൂറ്റ് കുടുംബം (400 കോടി ഡോളർ), ബൈജു രവീന്ദ്രൻ (360 കോടി ഡോളർ), ജോയ് ആലുക്കാസ് (310 കോടി ഡോളർ), എസ്. ഗോപാലകൃഷ്ണൻ (305 കോടി ഡോളർ) എന്നിവരാണ് കേരളത്തിൽ നിന്നുള്ള ആദ്യ അഞ്ച് പേർ. യൂസുഫലിക്ക് ഇന്ത്യയിൽ 35മത് സ്ഥാനമാണ് നിലവിലുള്ളത്. .
