റിയാദ്: സൗദി അറേബ്യയിൽ നിര്യാതനായ പ്രവാസി മലയാളിയുടെ മൃതദേഹം നാട്ടിലെത്തിച്ചു. തിരുവനന്തപുരം പൂവച്ചൽ സ്വദേശി ഷജീമാണ് മരിച്ചത്. (43). എയർ ഇന്ത്യയുടെ ജിദ്ദ-ഡൽഹി-തിരുവനന്തപുരം വിമാന സർവീസിൽ വൈകീട്ട് 6.40 ഓടെയാണ് നാട്ടിലെത്തിയത്.
15 വർഷത്തോളമായി അൽബാഹ ഫിഷ് മാർക്കറ്റിൽ ജോലിചെയ്യുകയായിരുന്നു ഷജീം. ജോലിക്ക് പോകുന്നതിനിടിയിൽ മാർക്കറ്റിൽ കുഴഞ്ഞുവീണ ഷജീമിനെ ഉടനെ ആശുപത്രിയിൽ എത്തിച്ചുവെങ്കിലും ജീവൻ രക്ഷിക്കാനായില്ല. ആറ് വർഷമായി നാട്ടിൽ പോകാതിരുന്ന ഷജീം ഭാര്യയേയും മക്കളേയും മൂന്ന് മാസത്തെ സന്ദർശന വിസയിൽ കൊണ്ടുവന്നിരുന്നു. രണ്ട് ആഴ്ച മുൻപാണ് ഇവർ നാട്ടിലേക്ക് മടങ്ങിയത്.
മൃതദേഹവുമായി ബന്ധപ്പെട്ട നിയമ നടപടിക്രമങ്ങൾ പൂർത്തിയാക്കുന്നതിനായി ബന്ധുക്കളും സുഹൃത്തുക്കളുമായ നവാസ്, അനസ്, സുധീർ, മഹ്‌റൂഫ് കോൺസുലേറ്റ് കമ്മ്യൂനിറ്റി വെൽഫെയർ കമ്മിറ്റി അംഗങ്ങളായ സയ്യിദലി അരീക്കര, യൂസുഫലി എന്നിവരും രംഗത്തുണ്ടായിരുന്നു. മൃതദ്ദേഹത്തെ സഹോദരിയുടെ മകൻ അനസ് അനുഗമിച്ചിരുന്നു.
