ദുബായ് – ലോക സാമ്പത്തിക മേഖലക്ക് ഈ വർഷം നിർണായകമാണെന്നും സാമ്പത്തിക മേഖല കടുത്ത വെല്ലുവിളികൾ നേരിടേണ്ടിവരുമെന്നും ഇന്‍റർനാഷനൽ മോണിറ്ററി ഫണ്ട് (ഐ.എം.എഫ്) മാനേജിങ് ഡയറക്ടർ ക്രിസ്റ്റലീന ജോർജിവ. ദുബായിൽ തിങ്കളാഴ്ച ആരംഭിക്കുന്ന ലോക സർക്കാർ ഉച്ചകോടിക്ക് മുന്നോടിയായി നടന്ന പരിപാടിയിൽ സംസാരിക്കുകയായിരുന്നു അവർ.
നിലവിൽ സാമ്പത്തിക വളർച്ച വർധിക്കുകയും പണപ്പെരുപ്പം കുറയുന്നതുമാണ് സാമ്പത്തിക മേഖലയിലും മറ്റും കാണുന്നത് എന്നാൽ ഈ വർഷവും സാമ്പത്തിക വളർച്ചയുണ്ടായില്ലെങ്കിൽ അവസ്ഥ കൂടുതൽ ദുർബലമാകും. സാവധാനത്തിലുള്ള വളർച്ചയാണ് പ്രതീക്ഷിക്കുന്നത്. അതിനാൽ, 2024ൽ പോലും ആവശ്യമായ വളർച്ചയിലേക്ക് എത്തില്ല. പണപ്പെരുപ്പത്തിനെതിരായ പോരാട്ടത്തിനാണ് ഈ വർഷം മുഖ്യപരിഗണന നൽകുന്നത്.
കഴിഞ്ഞ വർഷം 8.8 ശതമാനമായിരുന്ന പണപ്പെരുപ്പം ഈ വർഷം 6.6 ശതമാനവും അടുത്ത വർഷം 4.3 ശതമാനവുമായി മാറും. ഇത് പോസിറ്റിവ് സൂചനയാണ് സാമ്പത്തിക മേഖലയിൽ കാണിക്കുന്നത്. എന്നാൽ ഇത്തരം പ്രതിസന്ധികൾ നിലനിൽക്കുമ്പോഴും ദുരിത കാലഘട്ടങ്ങളിൽ മറ്റ് രാജ്യങ്ങളെ ചേർത്തുനിർത്താനും സഹായിക്കാനുള്ള ഗൾഫ് രാജ്യങ്ങളുടെ മനസ്സ് അഭിനന്ദനീയമാണെന്നും ഐ.എം.എഫ് മേധാവി കൂട്ടിച്ചേർത്തു.
