അബുദാബി: അബുദാബിയിൽ വാടക വർദ്ധനവ് താൽക്കാലികമായി മരവിപ്പിച്ചുകൊണ്ടുള്ള ഭരണകൂടത്തിന്റെ പുതിയ പ്രഖ്യാപനം പ്രവാസികൾ ഉൾപ്പെടെയുള്ള ആയിരക്കണക്കിന് കുടുംബങ്ങൾക്ക് വലിയ ആശ്വാസമായിരിക്കുകയാണ്. മുൻപുണ്ടായിരുന്ന 5 ശതമാനം വർദ്ധനവ് പരിധി പൂർണ്ണമായും ഒഴിവാക്കി പൂജ്യം ശതമാനമാക്കിയ (0%) ഈ നിയമം താമസ, വാണിജ്യ, വ്യവസായ കെട്ടിടങ്ങൾക്കെല്ലാം ബാധകമാണ്.
അടുത്ത അറിയിപ്പ് ഉണ്ടാകുന്നത് വരെ കരാർ പുതുക്കുമ്പോൾ അവസാനത്തെ ‘തൗതീഖ്’ (Tawtheeq) സർട്ടിഫിക്കറ്റിലെ അതേ തുക മാത്രമേ കെട്ടിട ഉടമകൾക്ക് ഈടാക്കാൻ അവകാശമുള്ളൂ.കഴിഞ്ഞ വർഷങ്ങളിൽ എമിറേറ്റിൽ വാടക നിരക്കുകൾ കുത്തനെ ഉയർന്ന പശ്ചാത്തലത്തിലാണ് വിപണിയിൽ സുരക്ഷിതത്വവും സ്ഥിരതയും ഉറപ്പാക്കാൻ സർക്കാർ ഈ അടിയന്തര ഇടപെടൽ നടത്തിയത്. എന്നാൽ ഈ ഉത്തരവ് നിലവിൽ വന്ന തീയതി മുതൽ പുതുക്കുന്ന പുതിയ കരാറുകൾക്ക് മാത്രമായിരിക്കും ഈ ഇളവ് ബാധകമാകുകയെന്ന് അധികൃതർ വ്യക്തമാക്കിയിട്ടുണ്ട്.
എന്തായാലും ജീവിതച്ചെലവ് വർദ്ധിച്ചുവരുന്ന ഈ സാഹചര്യത്തിൽ, വലിയൊരു സാമ്പത്തിക ഭാരമാണ് ഈ പ്രഖ്യാപനത്തിലൂടെ താമസക്കാർക്ക് ഒഴിഞ്ഞുപോയിരിക്കുന്നത്.
