ദുബായ് – വർക്കല ശിവഗിരി തീർത്ഥാടനത്തിന്റെ 90മത് വാർഷികവും, ശിവഗിരി ബ്രഹ്മ വിദ്യാലയത്തിന്റെ കനക ജൂബിലിയും, വിപുലമായ പരിപാടികളോടെ യു.എ.ഇയിൽ ആഘോഷിക്കുന്നു. അജ്മാൻ ജർഫിലുള്ള ഇന്ത്യൻ അസ്സോസിയേഷൻ ഹാളിൽ ഒക്ടോബർ 30 ന് രാവിലെ 9 മണിക്ക് കേരളത്തിന്റെ ബഹുമാനപ്പെട്ട കൃഷിവകുപ്പ് മന്ത്രി പി. പ്രസാദ് പരിപാടി ഉൽഘാടനം ചെയ്യും.
ഇതോട് അനുബന്ധിച്ചു ലോകമെമ്പാടും ഒരു വർഷം നീളുന്ന ആഘോഷപരിപാടികളാണ് ശിവഗിരി മഠത്തിന്റെ ഏക പോഷക സംഘടനയായ ഗുരുധർമ്മ പ്രചരണ സഭയുടെ നേതൃത്വത്തിൽ അരങ്ങേറുന്നത്. യു.എ.ഇയിൽ ഉള്ള ഗുരുധർമ്മ പ്രചരണസഭയുടെ നേതൃത്വത്തിൽ കനക നവതി 2022 എന്ന പേരിലാണ് ആഘോഷപരിപാടികൾ അരങ്ങേറുക എന്ന് ആഘോഷ കമ്മിറ്റി ചെയർമാൻ Adv Y A റഹിം അറിയിച്ചു.
രാവിലെ 7 മണിമുതൽ ആരംഭിക്കുന്ന പരിപാടിയിൽ ഗുരുദേവ ഭജന, സാംസ്കാരിക സമ്മേളനം. കലാപരിപാടികൾ, സംഗീത വിരുന്ന് തുടങ്ങിയവ ഉണ്ടായിരിക്കും. ശിവഗിരി മഠാധിപതി ബ്രഹ്മശ്രീ സച്ചിദാനന്ദ സ്വാമികൾ, ശ്രീമദ് ഋതംബരാനന്ദ സ്വാമികൾ, ശ്രീമദ് വീരേശ്വരാനന്ദ സ്വാമികൾ, GDPS രക്ഷാധികാരി Dr. K സുധാകരൻ എന്നിവരുടെ സാന്നിധ്യത്തിൽ നടക്കുന്ന സമ്മേളനത്തിൽ വിശ്വഗുരു ശ്രീനാരായണ ഗുരുദേവന്റെ ദർശനങ്ങളെപ്പറ്റിയും തീർത്ഥാടനത്തിന്റെ അഷ്ടലക്ഷ്യങ്ങളെ ആസ്പദമാക്കിയുമുള്ള പ്രഭാഷണങ്ങളും. മഹാഗുരുവിന്റെ കൃതികളെ ആസ്പദമാക്കിയുള്ള നൃത്താവിഷ്കാരങ്ങളും ഉണ്ടായിരിക്കുന്നതാണ്.
പ്രസ്തുത ചടങ്ങിൽ ഗുരുധർമ്മ പ്രചരണസഭ വൈസ് പ്രസിഡന്റ് ശ്രീ VK മുഹമ്മദ്, NTV ചെയർമാൻ ശ്രീ മാത്തുകുട്ടി കടോൺ, ജി.ഡി.പി.സ് മാതൃസഭ രക്ഷാധികാരി ശ്രീമതി അജിത രാജൻ, കനക നവതി ജനറൽ കൺവീനർ ശ്രീ കലാധർ ദാസ്, പ്രോഗ്രാം ഡയറക്ടർ ശ്രീ രാജീവ് പിള്ള എന്നിവർ സംസാരിക്കും. സാംസ്കാരിക സമ്മേളനത്തിൽ വെച്ച് റോയൽ ഫർണിചർ ഫൗണ്ടർ ശ്രീ സുഗതൻ, അൽ അമാനി ഗ്രൂപ്പ് ചെയർമാൻ ശ്രീ. TS രാജൻ, വിജയ ഇന്റർനാഷണൽ കൺവെൻഷൻ സെന്റർ ഫൗണ്ടർ ശ്രീ K P വിജയൻ എന്നീ മഹത് വ്യക്തികളെ ആദരിക്കും.
ആദരണീയനായ പാണക്കാട് സയീദ് മുഹമ്മദലി ശിഹാബ് തങ്ങളുടെ ജീവിത വീക്ഷണത്തെ പറ്റി മുജീബ് ജയ്ഹൂൺ രചിച്ച Slogans Of The Sage എന്ന പുസ്തകത്തിന്റെ മലയാള പതിപ്പ് ശിവഗിരി മഠാധിപതി പ്രകാശനം ചെയ്യും. ഒപ്പം മുജീബ് ജൈഹൂണിന് ശ്രീനാരായണ ഗുരു ശ്രേഷ്ഠ 2022 പുരസ്കാരം സമ്മാനിക്കും. സാമൂഹ്യ പ്രവർത്തകനായ പ്രേംസായി ഹരിദാസിനു ശ്രീനാരായണ ഗുരുകൃപ 2022 പുരസ്കാരവും പ്രസ്തുത ചടങ്ങിൽ സമ്മാനിക്കും.
ഉച്ചയ്ക്ക് ശേഷം പ്രമുഖ കലാകാരന്മാരുടെ നൃത്തനൃത്യങ്ങളും പ്രശസ്ത സിനിമ പിന്നണി ഗായകരായ ശ്രീ ശ്രീനാഥും ശ്രീമതി സോണിയയും, ദേവിക സൂര്യപ്രകാശും ഒപ്പം യു.എ.ഇയിലുള്ള ഗായകരും ഒന്നിച്ചുള്ള മ്യൂസിക്കൽ ഷോയും ഉണ്ടായിരിക്കുന്നതാണ്. ദുബായിൽ നടന്ന വാർത്താസമ്മേളനത്തിൽ ഗുരുധർമ്മ പ്രചരണ സഭ യു.എ.ഇ ഭാരവാഹികളായ ശ്രീ KP രാമകൃഷ്ണൻ, Adv. ശ്രീ ശ്യാം, P പ്രഭു, ശ്രീമതി സ്വപ്ന ഷാജി, ശ്രീ സുഭാഷ് ചന്ദ്ര, ശ്രീ ഉന്മേഷ് ജയന്തൻ എന്നിവർ പങ്കെടുത്തു.
