ദുബായ്: ദുബായിയിൽ കൂറ്റൻ തിരമാലയിൽപ്പെട്ട് മലയാളി വിദ്യാർത്ഥി മുങ്ങി മരിച്ചു. കാസർകോഡ് സ്വദേശി അബ്ദുള്ള മഫാസ് (15) ആണ് മരിച്ചത്. കൂടെയുണ്ടായിരുന്ന സഹോദരി ഫാത്തിമയെ രക്ഷപ്പെടുത്തി. ദുബായ് സ്കൂളിലെ പത്താം ക്ലാസ് വിദ്യാർത്ഥിയാണ് മഫാസ്. വെള്ളിയാഴ്ച ദുബായിലെ അൽ മംസാർ ബീച്ചിൽ അവധി ആഘോഷിക്കുകയായിരുന്നു മഫാസും കുടുബവും.
ബീച്ചിൽ കളിച്ചുകൊണ്ടിരിക്കുകയായിരുന്നു മഫാസും സഹോദരിയും. അപ്രതീക്ഷിതമായെത്തിയ തിരമാലയിൽ മഫാസും സഹോദരിയും മുങ്ങിപ്പോവുകയായിരുന്നു. കുട്ടികളുടെ കരച്ചിൽ കേട്ടെത്തിയ അറബ് വംശജനാണ് സഹോദരിയെ രക്ഷിച്ചത്. തുടർന്ന് നടത്തിയ തിരച്ചിലിനൊടുവിൽ ശനിയാഴ്ച വൈകിട്ടാണ് ദുബായ് പൊലീസ് മഫാസിന്റെ മൃതദേഹം കണ്ടെത്തിയത്. നടപടിക്രമങ്ങൾക്ക് ശേഷം മൃതദേഹം ദുബായിൽ ഖബറടക്കുമെന്ന് ബന്ധുക്കൾ പറഞ്ഞു.
കാസർകോഡ് ചെങ്കള സ്വദേശിയും ദുബായിൽ വ്യാപാരിയുമായ മുഹമ്മദ് അഷ്റഫിന്റേയും നസീമയുടേയും മൂന്നാമത്തെ മകനാണ് മഫാസ്. അപകടത്തിൽ നിന്ന് രക്ഷപ്പെട്ട ഫാത്തിമ എംബിഎ വിദ്യാർത്ഥിനിയാണ്.
