മസ്‌കത്ത്: ലഹരിമരുന്ന്, സൈക്കോട്രോപിക് ലഹരിവസ്തുക്കൾ എന്നിവയുമായി ബന്ധപ്പെട്ട കുറ്റകൃത്യങ്ങൾ തടയുന്നതിനുള്ള നിയമത്തിലെ പ്രധാന വ്യവസ്ഥകൾ വിശദീകരിച്ച് ഒമാൻ പബ്ലിക് പ്രോസിക്യൂഷൻ.
ലഹരിമരുന്ന് കേസുകളിൽ കുറ്റനടപടികളിൽനിന്ന് ഒഴിവാകാനുള്ള അപേക്ഷ സമർപ്പിക്കാവുന്ന ബന്ധുക്കളുടെ പരിധി നിയമം വിപുലീകരിച്ചിട്ടുണ്ട്. രണ്ടാം ഡിഗ്രിയിൽപ്പെട്ട ബന്ധുക്കൾ ലഭ്യമല്ലാത്ത സാഹചര്യത്തിൽ നാലാം ഡിഗ്രിവരെയുള്ള ബന്ധുക്കൾക്കും അപേക്ഷ നൽകാം.
ലഹരിമരുന്ന് കുറ്റകൃത്യങ്ങളുമായി ബന്ധപ്പെട്ട അന്വേഷണങ്ങളിൽ സഹകരിക്കുന്ന സാക്ഷികൾക്കും മറ്റ് വ്യക്തികൾക്കും നിയമപരമായ സംരക്ഷണം ഉറപ്പാക്കും. ഇത്തരം കുറ്റകൃത്യങ്ങൾ നടക്കുന്ന സ്ഥാപനങ്ങൾ മൂന്ന് മാസം മുതൽ ഒരു വർഷം വരെ അടച്ചുപൂട്ടാനും നിയമം വ്യവസ്ഥ ചെയ്യുന്നു. നിർദിഷ്ട സാഹചര്യങ്ങളിൽ സ്ഥിരമായി അടച്ചുപൂട്ടാനും സാധിക്കും.
അതേസമയം, നിയമത്തിൽ വ്യക്തമാക്കിയ സാഹചര്യങ്ങളിൽ ലഹരിമരുന്ന് പരിശോധനയ്ക്കായി സാമ്പിൾ നൽകാൻ വിസമ്മതിക്കുന്നതും കുറ്റകരമാകും. ലഹരിമരുന്ന് ഉപയോഗിച്ചതായി സംശയിക്കുന്ന ഒരാളെ അറസ്റ്റ് ചെയ്യാൻ പബ്ലിക് പ്രോസിക്യൂഷൻ അനുമതി നൽകിയ സാഹചര്യത്തിലും കുടുംബാംഗങ്ങൾ ലഹരിമരുന്ന് ഉപയോഗമോ കൈവശംവെക്കലോ സംബന്ധിച്ച് റിപ്പോർട്ട് നൽകിയ സാഹചര്യത്തിലും ഈ വ്യവസ്ഥ ബാധകമാകുമെന്ന് അധികൃതർ വ്യക്തമാക്കി.
