അബൂദബി: അബൂദബിയിൽ നടന്ന ‘മേക്ക് ഇറ്റ് ഇൻ ദി എമിറേറ്റ്സ് 2026’ എക്സിബിഷനിൽ ദുബൈ ആസ്ഥാനമായ പ്രമുഖ പാക്കേജിങ് കമ്പനിയായ ഹോട്ട്പാക്കിന് യു.എ.ഇ സർക്കാറിന്റെ ഔദ്യോഗിക അംഗീകാരം. കഴിഞ്ഞ മൂന്ന് പതിറ്റാണ്ടിലേറെയായി സുസ്ഥിര നിർമാണം, നവീകരണം, യു.എ.ഇയുടെ വ്യാവസായിക വളർച്ച എന്നീ മേഖലകളിൽ കമ്പനി നൽകിയ മികച്ച സംഭാവനകൾ കണക്കിലെടുത്താണ് ഈ ആദരം നൽകിയത്.
പരിസ്ഥിതി സൗഹൃദ പാക്കേജിങ് ഉത്പന്നങ്ങളുടെ ആഗോള നിർമാതാക്കളായ ഹോട്ട്പാക്കിന്, യു.എ.ഇയുടെ വ്യാവസായിക വികസന ചരിത്രത്തിന്റെ ഭാഗമായി ലഭിച്ച ഈ സവിശേഷ പുരസ്കാരത്തിന് പുറമെ, എക്സിബിഷന്റെ ഭാഗമായി ഒരുക്കിയ ‘ഹൗസ് ഓഫ് ഇൻഡസ്ട്രീസ്’ (House of Industries) എന്ന പ്രത്യേക പ്രദർശന വിഭാഗത്തിലും ഇടം ലഭിച്ചു. യു.എ.ഇയുടെ വ്യാവസായിക മുന്നേറ്റത്തിലും ഭക്ഷ്യസുരക്ഷാ രംഗത്തും കമ്പനിക്കുള്ള നിർണായക പങ്കിനെ അടിവരയിടുന്നതാണ് ഈ നേട്ടമെന്ന് അധികൃതർ വ്യക്തമാക്കി.
