ദുബായ് – ദുബായ് പൊലീസിന് 100 പുത്തൻ വാഹനങ്ങൾ സമ്മാനിച്ച് ദുബായിലെ പ്രമുഖ വ്യവസായി ഗ്രൂപ്പായ അൽ ഹബ്തൂർ ഗ്രൂപ്പ് സ്ഥാപകനും ചെയർമാനുമായ ഖലഫ് അഹ്മദ് അൽ ഹബ്തൂരി. നാളിതുവരെ ദുബായിലെ സുരക്ഷ വർധിപ്പിക്കാനുള്ള ദുബായ് പൊലീസിന്റെ ശ്രമങ്ങൾക്ക് പിന്തുണനൽകാനും സേനയുടെ പ്രവർത്തനങ്ങളെ പരിപോഷിക്കാനും ലക്ഷ്യമിട്ടാണ് ഖലഫ് അഹ്മദ് അൽ ഹബ്തൂരി ഇത്തരം ഒരു സമ്മാനം ദുബായ് പോലീസിന് നൽകിയത്. മിത്സുബിഷി പജേറോ എസ്.യു.വികളാണ് ഇത്തരത്തിൽ സേനയുടെ ഭാഗമായിത്തീർന്നത്.
രാജ്യത്തിന്‍റെ സുരക്ഷിതത്വബോധം വർധിപ്പിക്കുന്നതിന് ദുബൈ പൊലീസുമായി സഹകരിക്കുന്നതിൽ സന്തോഷമുണ്ടെന്നും, രാജ്യത്തെയും ജനങ്ങളെയും സേവിക്കാൻ സർക്കാരുമായി കൈകോർക്കുന്നത് സാമൂഹിക ഉത്തരവാദിത്തമാണെന്നും ദുബൈ നൽകുന്ന സുരക്ഷയിൽ അഭിമാനമുണ്ടെന്നും ഖലഫ് അൽ ഹബ്തൂരി പറഞ്ഞു.
ഹബ്തൂറിന്‍റെ പ്രവൃത്തി അഭിനന്ദനാർഹമാണെന്ന് ദുബൈ പൊലീസ് കമാൻഡർ ഇൻ ചീഫ് ലഫ്റ്റനന്‍റ് ജനറൽ അബ്ദുല്ല ഖലീഫ അൽ മർറി പറഞ്ഞു. പൊലീസ് പ്രവർത്തനങ്ങൾ വർധിപ്പിക്കുന്നതിനും ലക്ഷ്യത്തെ പിന്തുണയ്ക്കുന്നതിനും ഈ വാഹനങ്ങൾ മുതൽക്കൂട്ടാകുമെന്നും അദ്ദേഹം കൂട്ടിച്ചേർത്തു. അസിസ്സ്റ്റന്‍റ് കമാൻഡർ ഇൻ ചീഫ് അബ്ദുല്ല അലി അൽ ഗൈതിയും പരിപാടിയിൽ സന്നിഹിതനായിരുന്നു.
