ബ്രൂണെയുടെ ഇന്ത്യയിലെ ഓണററി ട്രേഡ് കമ്മീഷണറായി മലയാളിയും പ്രവാസി വ്യവസായിയുമായ എൻഎം പണിയ്ക്കർ നിയമിതനായി. വിദേശകാര്യ മന്ത്രാലയത്തിന്റേയും ഇന്ത്യൻ ഇക്കണോമിക് ട്രേഡ് ഓർഗനൈസേഷന്റെയും ശുപാർശകളെ തുടർന്നാണ് നിയമനം. ചെന്നൈയിലെ ഐ.ടി.സി ഗ്രാൻഡ് ചോള ഹോട്ടലിൽ നടന്ന ചടങ്ങിൽ ഇന്ത്യയിലെ ബ്രൂണെ ദാറുസലാം ഹൈകമീഷണർ ഡാറ്റോ അലാഹുദ്ദീൻ മുഹമ്മദ് താഹയിൽനിന്ന് എൻഎം പണിക്കർ ട്രേഡ് കമീഷണർ പദവി സ്വീകരിച്ചതായി അദ്ദേഹം ദുബായിൽ വാർത്തസമ്മേളനത്തിൽ അറിയിച്ചു. ട്രേഡ് കമ്മീഷണറായുള്ള ഔദ്യോഗിക നിയമന ചടങ്ങ് ഡിസംബറിൽ ബ്രൂണെയിൽ നടക്കും.വേൾഡ് മലയാളി കൗൺസിൽ മിഡിലീസ്റ്റ് റീജ്യന്‍റെ ഗുഡ് വിൽ അംബാസിഡർ കൂടിയാണ് പണിക്കർ.
ഇന്ത്യും ബ്രൂണെയും തമ്മിലുള്ള വ്യാപാരം പ്രോത്സാഹിപ്പിക്കുന്നതിന് സാമ്പത്തിക സഹകരണം മെച്ചപ്പെടുത്തുന്നതിനുള്ള നടപടികളിൽ സജീവമാകുമന്ന് എം എൻ പണിയ്ക്കർ പറഞ്ഞു. മറൈൻ മേഖലയിൽ വലിയ സാധ്യതയുണ്ടെന്നും ഇരു രാജ്യങ്ങൾക്കുമിടയിൽ മറൈൻ വ്.വസായത്തെ വളർത്തുന്നതിനുള്ള സാഹചര്യം പ്രോത്സാഹിപ്പിക്കുമെന്നും പറഞ്ഞു.
മറൈൻ മേഖലയിലെ വർധിച്ചുവരുന്ന തൊഴിൽ സാധ്യതകൾ കണക്കിലെടുത്ത് കേരളത്തിൽ പ്രത്യേക പരിശീലന കേന്ദ്രം സ്ഥാപിക്കുമെന്ന് അദ്ദേഹം പറഞ്ഞു. മറൈൻ മേഖലയിൽ തൽപരരായ 10 ഉദ്യോഗാർഥികളെ കണ്ടെത്തി അവർക്ക് ആറുമാസത്തെ സൗജന്യ പരിശീലനം നൽകും.
കോട്ടയം കാഞ്ഞിരപ്പള്ളി അമൽ ജ്യോതി എൻജീനിയറിങ് കോളെജിലാണ് പരീലന കേന്ദ്രം സ്ഥാപിക്കുക. കോഴ്സ് പൂർത്തീകരിയ്ക്കുന്ന വിദ്യാർത്ഥികൾക്ക് ദുബായിലെ എക്‌സ്‌പെർട്ട് യുണൈറ്റഡ് മറൈൻ സർവീസ് കമ്പനിയുടെ ഷിപ്യാർഡിൽ പരിശീലനം നൽകും. കേരളത്തിലെ വിദ്യാർത്ഥികൾക്ക് ആഗോള മറൈൻ മേഖലയിൽ പ്രവേശിയ്ക്കുന്നതിനുള്ള ആദ്യ സംരഭമാണിത്.
ഇരു രാജ്യങ്ങളിലെയും പ്രതിനിധികൾ ചടങ്ങിൽ പങ്കെടുക്കും. വേള്‍ഡ് മലയാളി കൗണ്‍സില്‍ മിഡിൽ ഈസ്റ്റ് റീജിയൺ ജനറൽ സെക്രട്ടറി ഡോക്ടർ ജെറോ വർഗീസ്, അജ്മാന്‍ പ്രൊവിന്‍സ് പ്രസിഡന്‍റ് ഡയസ് ഇടിക്കുള എന്നിവരും വാർത്താസമ്മേളത്തില്‍ സംബന്ധിച്ചു.
