ദുബായ് – രാജ്യത്തിന്റെ സുരക്ഷിതത്വം സംരക്ഷിക്കേണ്ടതിന്റെ ഭാഗമായി വിവിധ ഓപറേഷനുകളിലായി 13.2 കോടി ദിർഹം വിലവരുന്ന 111 കിലോ ലഹരിമരുന്നുമായി 28 പേരെ ദുബൈ പൊലീസ് അറസ്റ്റ് ചെയ്തു. വിവിധ രാജ്യങ്ങളിൽനിന്നുള്ള മൂന്നു സംഘങ്ങളെയാണ് പൊലീസ് പിടികൂടിയത്. 99 കിലോ കാപ്റ്റഗൺ ഗുളിക, 12 കിലോ ക്രിസ്റ്റൽ മെത്ത്, ഹെറോയിൻ, കഞ്ചാവ് എന്നിവയടങ്ങുന്നതാണ് ലഹരിമരുന്ന്. വ്യത്യസ്തങ്ങളായ തന്ത്രപ്രധാനമായ മൂന്ന് ഓപറേഷനുകളിലായാണ് മൂന്നു ഗ്യാങ്ങുകളെയും വലയിലാക്കിയത്. മുൻകൂട്ടി തയാറാക്കിയ നീക്കം വഴി ആദ്യ ഓപറേഷനിൽ മൂന്നു പേരിൽനിന്നും ലഹരിമരുന്ന് വിൽക്കാനുള്ള ശ്രമത്തിനിടയിൽ മാത്രം 3.1 കോടി രൂപ വിലവരുന്ന കാപ്റ്റഗൺ പിടികൂടിയത്.
രണ്ടാമത്തെ ഓപറേഷനിൽ ഫോൺ വഴി മയക്കുമരുന്ന് വിൽപനക്ക് ശ്രമിക്കുന്നയാളെയും പിടികൂടി. ഇയാളിൽനിന്ന് 9.7 കിലോഗ്രാം ക്രിസ്റ്റൽ മെത്തും മയക്കുമരുന്ന് നിർമിക്കാൻ ഉപയോഗിക്കുന്ന വസ്തുക്കളും കണ്ടെത്തി. അവസാനഘട്ടം മൂന്നാം ഓപറേഷനിൽ സമൂഹമാധ്യമങ്ങൾ വഴി ലഹരിമരുന്ന് വിൽക്കുന്നയാളെ തേടിയിറങ്ങിയപ്പോഴാണ് 23 പേർ കുടുങ്ങിയത്. ഹെറോയിൻ, ക്രിസ്റ്റൽ മിത്ത്, ഹഷീഷ് എന്നിവയാണ് ഇവരിൽനിന്ന് പിടിച്ചത്.
ലഹരിമരുന്ന് ഉപയോഗമോ വിൽപനയോ ശ്രദ്ധയിൽപെട്ടാൽ 901 എന്ന നമ്പറിലോ ദുബൈ പൊലീസ് ആപ്പിലെ ‘പൊലീസ് ഐ’ സേവനം വഴിയോ വിവരം അറിയിക്കണമെന്ന് പൊലീസ് അധികൃതർ പറഞ്ഞു.
